Primeiru Ministru, Taur Matan Ruak. Imajen/ Egas Cristovão

DILI, 09 marsu 2020 (TATOLI) – Primeiru Ministru, Tau Matan Ruak, fó orientasaun ba liña ministériu sira atu koopera halo atendimentu urjénsia ba sidadaun Italianu ida ne’ebé deskonfia suspeita ba Coronavirus no agora hala’o hela tratamentu saúde iha Sentru Izolamentu ba Coronavirus iha Community House Limited, Tibar.

Notísia Relevante : Governu Husu Komunidade Tibar Labele Impede Harii Sentru Izolamentu Ba COVID-19

 “Primeiru Ministru Taur Matan Ruak fó orden ba defeza no seguransa bele kolabora ho liña ministériu no Ministériu Saúde atu fó atensaun másimu  prevensaun Coronavirus ne’ebé mai daudaun,” dehan Ministru Defeza no Ministru Interiór Internu, Filomeno da Paixão de Jesus, ba jornalista,  ohin, bainhira remata enkontru ho Primeiru Ministru, Taur Matan Ruak iha Palásiu Governu Dili.

Nia dehan, PM Taur rasik mós husu ona ba Vise Ministru Saúde na’in rua atu kontinua koordena ho Organizasaun Saúde Mundiál (OMS) hodi haree situasaun Coronavirus labele afeta ba povu Timor-Leste.

Iha parte seluk, Ministru Filomeno dehan, nia parte mós husu ona ba Komandu PNTL hodi koloka membru Unidade Espesiál Polisia (UEP) hodi asegura situasaun seguransa iha Sentru Izolamentu ba Coronavirus iha Community House Limited, Tibar.

Iha parte seluk, Ministru Filomeno aprezenta mós problema video ne’ebé autór membru  PNTL balun lansa iha rede sosiál Facebook hodi dehan,  informasaun ne’e laloos hodi akuza lider Timor-Leste, Xanana Gusmão no Brigadeiru Jenerál Mau-Nana.

Jornalista : Eugénio Pereira  

Editór       : Francisco Simões

HAKEREK NO HATÁN

Please enter your comment!
Please enter your name here