Vise-Ministru Obra Públika, Nicolau Lino Freitas Belo. Imajen Tatoli/Egas Cristovão

DILI, 06 marsu 2020 (TATOLI) – Atu hasa’e prestasaun servisu Eletricidade de Timor-Leste (EDTL) no Diresaun Jerál Água no Saneamentu (DGAS,sigla portugués), Ministériu Obra Públika (MOP) finaliza ona ezbosu lei atu transforma instituisaun rua ne’e ba Empreza Públika (EP) no submete ona ba Ministériu Reforma Lejizlativa no Asuntu Parlamentár (MRLAP).

Vise-Ministru Obra Públika, Nicolau Lino Freitas Belo, informa MOP liuhosi ekipa jurizdisaun maka finaliza ona ezbosu ne’e no daudaun iha ona MRLAP hodi halo diskusaun no avalia ho ekipa jurídiku sira.

“Maski ita nia situasaun polítika ohin loron seidauk estável, maibé MOP lori tiha ona ezbosu lei tranformasaun EDTL no DGAS ba MRLAP atu halo diskusaun ba ezbosu lei ne’e molok submete ba Konsellu Ministru hodi diskute”, tenik Vise-Ministru Nicolau ba Agência TATOLI iha Sentru Kovensaun Dili (CCD,sigla portugés), sesta ne’e.

Notísia Relevante:MOP Prepara Ona Esbosu Atu Transforma EDTL no DGAS ba Empreza Públika

Nune’e, nia realsa, téknikamente bainhira atu diskute ezbosu lei ne’e maka presiza ekipa MRLAP hamutuk ho unidade jurídiku MOP hodi bele haree rekezitu no legalidade saida de’it mak EDTL no DGAS presiza kumpre hodi transforma ba Empresa Públiku.

Governante ne’e refere tan, presiza mós haree kritéria no kondisaun, liuliu rekursu umanu hafoin bele transforma instituisaun rua ne’ebé tutela ba MOP ne’e ba EP.

Bainhira tempu ne’e to’o, sei oferese opsaun rua ba funsionáriu sira hotu atu hili hanesan, mantein estatutu hanesan Funsionáriu Públiku ka rezigna-an hodi sai nu’udar Funsionáriu Empreza.

“Tanba rekursu umanu ne’e importante ba EDTL no DGAS, maka ita presiza haree funsionáriu hirak mak sei ba iha empreza públika no funsionáriu hira mak hakarak sai permanente, tenke liuhosi lejizlasaun ida”, nia akresenta.

Nicolau subliña, polítika VIII Governu atu halo transformasaun ne’e tanba atu aumenta reseita ba kofre estadu no mós hasa’e volume fornesimentu eletrisidade ba povu iha territóriu.

Nune’e, antes MOP prepera ezbosu lei ne’e, sei liuhosi estudu hodi hatene impaktu no análiza ekonómiku.

Tanba ne’e, Nicolau konsidera presiza transforma instituisaun rua ne’e ba EP atu funsionáriu sira bele halo atendimentu ho di’ak liután ba públiku, tanba daudaun ne’e populasaun porsentu 83 ona maka asesu ona ba eletrisidade.

“Tanba ne’e, presiza prestasaun servisu di’ak atubele rezolve fornesimentu liña eletrisidade ba povu”, nia salienta.

Daudaun ne’e, iha Funsionáriu Públiku na’in-500 resin maka serbisu iha EDTL, tanba ne’e bainhira sai EP, funsionáriu sira bele halo atendimentu di’ak liu ba públiku.

Antes ne’e, parte MOP halo ona enkontru ho Komisaun Funsaun Públika hodi buka solusaun ba destinu Funsionáriu Públiku ne’ebé servisu iha EDTL.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here