Prezidente Parlamentu Nasionál (PN), Arão Noé de Jesus da Costa Amaral. Imajen António Gonçalves

DILI, 5 marsu 2020 (TATOLI)—Prezidente Parlamentu Nasionál, Aráo Noé de Jesus da Costa hateten, ohin, iha reuniaun líder bankada aprova ona rekerimentu partidu Congresso Nacional da Reconstrução de Timor (CNRT) kona-ba informasaun balu ne’ebé fó-sai iha rede sosiál hodi temi líder másimu nia naran envolve iha prodús osan falsu.

Nia hatutan, ajenda debate ho karáter urjénsia ne’e fiksa ba tersa-feira no líder bankada sira konkorda no aprova rekerimentu hosi bankada CNRT ne’e.

“Ohin, líder bankada sira aprova ona rekerimentu ne’e hodi husu debate ho karáter urjénsia no konvoka artigu 56 rejimentu parlamentu nian hodi konvida señor Ministru Defeza no Seguransa, bele marka prezensa ho Komandante PNTL para atu esplika pontu situasaun ida-ne’e atu nune’e publiku labele hela ho pániku ba informasaun ne’ebé divulga iha mídia sosiál,”  dehan Prezidente Parlamentu Nasionál, Aráo Noe, ba jornalista sira iha sala konferénsia Parlamentu Nasionál, ohin.

Prezidente Parlamentu Nasionál hateten, maske informasaun balu komandu fó-sai ona konferénsia imprensa maibé deputadu sira hakarak iha esklaresimentu kle’an liután kona-ba asuntu ne’e.

Nia hatutan, debate ne’e nakloke ba públiku nune’e povu tomak bele akompaña asuntu ne’e ho esklaresidu.

“Ami sei husu halo transmisaun direita para nune’e públiku bele hatene kona-ba asuntu ne’e. Tanba, problema ne’e liga ba naran di’ak líder másimu sira-nian no realidade loloos kazu ne’e saida. Prodús duni osan falsu ka tanba buat seluk. Ha’u hanoin asuntu ne’e iha debate ne’e bele hetan klarifikasaun,” nia hateten.

Ohin ka aban, Prezidente Parlamentu Nasionál sei haruka karta ofisiál ba Primeiru-Ministru, Taur Matan Ruak, hodi fó autorizasaun ba Ministru Defeza no Seguransa, Filomeno Paixão de Jesus, nune’e bele marka prezensa iha plenária,tersa-feira (10/3/2020) semana oin.

Notísia Relevante: Lere Fiar, Xanana ho Mau-Nana La Envolve iha Kazu Produsaun Osan Falsu

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here