Sekretáriu Jerál Partidu UDT, Fracisco David Xavier Carlos. Imajen Tatoli/Cipriano Colo

DILI, 08 marsu 2020 (TATOLI)–Partidu União Democrática Timorense (UDT), ohin, halo konferénsia hodi reafirma UDT nia pozisaun atu fó apoiu tomak ba koligasaun foun ne’ebé lidera husi Kay Rala Xanana Gusmão hodi fó resposta ba pedidu hosi Prezidente Repúblika (PR) Francisco Guterres “Lú Olo”. 

“Konferénsia ne’e atu reafirma fila fali pozisaun partidu União Democrática Timorense (UDT) nian, hamutuk ho koligasaun ne’ebé lidera husi prezidente partidu Congresso Nacionál Reconstrução Timorense (CNRT) Kay Rala Xanana Gusmão, Klibur Haburas Unidade Timor Oan (KHUNTO), Partidu Democrático (PD), Frente Mudança (FM), no Partidu Unidade Desenvolvimiento Democrático (PUDD),” Sekretáriu Jerál UDT Francisco David Xavier Carlos hato’o asuntu ne’e ba TATOLI molok hala’o abertura ba konferénsia iha sede Nasionál UDT palapásu, Dili.

Nia esplika, Konferénsia ne’e sei hala’o durante loron ida no sei konklui atu reafirma pozisaun UDT nian ho klareza katak UDT fó apoiu tomak ba iha koligasaun foun ne’e, hodi nune’e bele hato’o hikas ba Prezidente Repúblika atu bele forma fila fali IX Governu konstitusionál.

“Pontus importante ne’ebé sei ko’alia iha konferénsia loron ida ne’e maka atu fó sai ba Udetista iha munisípiu sanulu resin rua inklui RAEOA katak, pozisaun UTD oras ne’e daudaun atu fó apoiu tomak ba iha koligasaun ida ne’ebé lideradu husi Kay Rala Xanana Gusmão. Tanba UDT hakarak mós atu asegura uma boa Governasaun ida ne’ebé di’ak, kualidade, to’o 2023,” Francisco subliña.

Atuál membru Parlamentu Nasionál ne’e informa, tuir estatutu internu partidu nian katak partisipante másimu ba konferénsia ne’e tenke atinje ema atus rua (200) no ohin loron partisipa másimu husi Udetista sira iha konferénsia importante ne’e.

Iha konferénsia ne’e rasik, hola parte husi partisipante reprezentante kada munisípiu inklui Rejiaun Administrativa Espesiál Oe-Cussi Ambenu (RAEOA), inklui konsellu katuas sira munisípiu ida-idak nian, órgaun feto UDT, no órgaun joven UDT nian.

Antes ne’e, iha loron neen (6) fulan ne’e, reprezentante másimu UDT, akompaña mós líder másimu husi partidu lima seluk, hanesan CNRT, KHUNTO, PD, PUDD, no FM ne’ebé forma ona koligasaun foun, aprezenta ona koligasaun foun ne’e ba Prezidente Repúblika Francisco Guterres “Lú Olo”.

Notísia Relevante: UDT/FM Hakarak “Governu Grande Inkluzaun”

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here