Portavóz UDT/FM no atuál Prezidente Bankada UDT, Francisco David Xavier Carlos dadalia ho jornalista sira hafoin hala'o enkontru ho Prezidente Repúblika. Imajen Tatoli/ Egas Cristóvão

DILI, 23 janeiru 2020 (TATOLI)–Proposta ne’ebé líder sira husi Partidu União Democrática Timorense (UDT) /Frenti-Mudança (FM) hato’o ba Prezidente Repúblika (PR), Francisco Guterres Lú Olo maka formasaun “Governu grande inkluzaun”.

Prezidente Bankada UDT/FM, Francisco David Carlos hanesan mós portavós fó-sai proposta ne’e, hafoin enkontru ho Xefe Estadu iha Palásiu Prezidente Nicolau Lobato, Bairru Pité, Dili, ohin.

“Opiniaun fundamentál ne’ebé ami hato’o ba Prezidente Repúblika maka oinsá ita haree situasaun polítika rai-laran agora ne’e, Orsamentu Jerál Estadu (OJE) xumba. Nune’e, ami fó oinsá mak nai-ulun sira bele tuur hamutuk fó liman ba malu hodi tau interese nasaun nian aas liu interese partidu nian. Ida-ne’e mak ba futuru sei armoniza sistema governasaun ne’ebé di’ak, ba povu nia moris di’ak. Ami-nia preferénsia ne’ebé hato’o ba Prezidente Repúblika katak se bele ita forma de’it mak Governu grande inkluzaun. Tanba, eleisaun antesipada, povu barak liu baruk ona ho situasaun polítika rai-laran, situasaun ida seidauk hotu, mosu tan eleisaun antesipada. Ne’e mal gastu orsamentu Estadu. Maibé, desizaun hotu depende ba Prezidente Repúblika”, nia hateten.

Kona-ba deklarasaun Primeiru-Ministru, Taur Matan Ruak dehan katak AMP la eziste ona, Francisco hateten, UDT/FM ba iha Parlamentu Nasionál fó de’it apoiu ba AMP no tenke husu filafali ba Primeiru-Ministru kona-ba deklarasaun ne’e.

“Deklarasaun ida-ne’e tenke husu fali ba Primeiru-Ministru, Taur Matan Ruak, tanba ami ba iha Parlamentu Nasionál (PN) atu apoiu de’it programa AMP hodi garante governasaun ne’e diak liután ba povu nia moris di’ak”, nia hateten.

Nune’e mós, Prezidente Interinu FM, Egídio de Jesus hateten, iha lisan Timor nian, iha nahe biti-boot no ki’ik hodi rezolve problema.

Tanba ne’e, nia dehan, líder sira husi UDT/FM, mai hodi fó netik opiniaun freska ruma ba Prezidente Repúblika, atu oinsá mak bele rezolve problema.

“Ideál liu mak tenke tuur hamutuk”, nia sujere.

Egídio apela ba povu hotu-hotu, liuliu militante no simpatizantes FM nian, hakmatek iha fatin, kamaradajen hala’o nafatin, atubele fó tempu ba Xefe Estadu, hodi tuur hamutuk ho órgaun soberanu sira seluk hodi buka solusaun pasífika liu, iha pás, domin no dame, atu Governu bele efetua nia knaar ba serbí povu ida-ne’e.

Governu Grande Inkluzaun nia kompozisaun ne’e sei envolve ponténsia sira hotu hanesan intelektuál sira hosi akadémiku, partidu polítiku, sosiedade sivíl no sira seluk.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here