DILI, 08 marsu 2020 (TATOLI)–Bazeia ba estatutu, Partidu Kmanek Haburas Unidade Timor Oan (KHUNTO) realiza Kongresu Nasionál daruak ne’ebé delegadu sira hamutuk ema na’in-836, deside hodi aprova estrutura ezekutivu nasionál períudu 2020-2024 re-eleita atuál Prezidente Armanda Berta dos Santos hodi lidera hikas partidu KHUNTO.
Sekretáriu Prezidénsia Meza Kongressu Nasionál daruak KHUNTO nian, Augusto de Jesus Alves, lee rezolusaun ne’e katak, Armanda Berta dos Santos re-eleita husi aklamasaun ho rezolusaun númeru 12/KN-Partidu KHUNTO/III/2020.
Aleinde ne’e, Sekretáriu Jerál Partidu KHUNTO, José Agustinho da Silva re-eleitu husi aklamasaun ho rezolusaun númeru 12/KN-Partidu KHUNTO/III/2020.
Entretantu, sira ne’ebé eleitu liuhosi eleisaun demokrátika mak hanesan Nicolau Freitas Belo eleitu sai primeiru vise-prezidente hodi substitui António Verdial de Sousa Gama, Joaquim Gusmão sai segundu vise-prezidente hodi substitui Olinda Guterres, automátikamente aumenta terseiru vise-prezidente, Pedro Reis ho kuartu vise, Sílvia Hornay.
Aleinde ne’e, Adjuntu Sekretáriu Jerál Partidu KHUNTO eleitu mak José Turquel hodi substitui Luís Roberto, segundu adjuntu sekretáriu Jerál, Abilio Xavier Lebo substitui João Joni Jacarias, terseiru adjuntu sekretáriu jerál, Zeto Patrício substitui António Nobre, no aumenta automátikamente kuarta adjunta sekretáriu Jerál, Regina Amaral.
Iha nia deskursu, Prezidente Eleita Armanda Berta dos Santos agradese ba Konsellu Superiór no kongresista sira hotu ne’ebé depozita hikas konfiansa ba nia atu lidera dala ida tan Partidu KHUNTO ba períudu 2020-2024 hamutuk ho kompozisaun sira ne’ebé eleitu.
Armanda promete, kompozisaun foun ne’e sei esforsu maka’as atu implementa programa sira ne’ebé planeia tiha ona ba períudu 2020-2024, tuir polítika ne’ebé KHUNTO hanai.
Entretantu, segundu Kongressu Nasionál Partidu Kmanek Haburas Unidade Timor Oan (KHUNTO) ne’e, deside hodi aprova estrutura ezekutivu Nasionál ba períudu 2020-2024 tuir rezolusaun Nú. 16/KN-P KHUNTO/III/2020.
Partidu KHUNTO eziste iha Timor Leste, bazeia ba leí númeru 2/2016, 3 de Fevereiro, primeiru alterasaun ba le númeru 3/2004, 14 de Abríl kona-ba partidu politiku sira no rejistu partidu KHUNTO iha Tribunál Rekursu ho data ne’ebé hasai iha loron 20 fulan-juñu 2011.
Notísia Relevante: KHUNTO Deklara Integra ba Koligasaun Foun
Jornalista : Cipriano Colo
Editór : Cancio Ximenes
