Prezidente Partidu Kmanek Haburas Unidade Timor Oan (KHUNTO) Armanda Berta dos Santos. Imajen/ Egas Cristovão

DILI, 07 marsu 2020 (TATOLI)—Partidu Kmanek Haburas Unidade Nasionál Timor Oan (KHUNTO) liuhosi Kongresu Nasionál deklara KHUNTO integra ho koligasaun foun ne’ebé lidera hosi Partidu Congresso Nacional da Reconstrução de Timor (CNRT).

Prezidente Partidu KHUNTO, Armanda Berta dos Santos hateten, partidu KHUNTO hola-parte iha koligasaun foun ho sentidu estadu tanba ne’e responsabilidade morál no polítika.

“Ho konsiderasaun ne’e partidu KHUNTO liuhosi Kongresu Nasionál ba Daruak nian desde liuhosi rezolusaun númeru 4-Kongresu Nasionál Partidu KHUNTO ninian iha 2020 hodi hola-parte integramente koligasaun polítiku hamutuk ho partidu polítiku asentu parlamentár sira hodi bele viabiliza formasaun IX Governu tuir matadalan Konstituisaun RDTL,” Prezidente Partidu KHUNTO, Armada Berta dos Santos, informa liuhosi konferénsia imprensa iha ámbitu kongresu nasionál iha Sentru Konvensaun Dili (CCD-sigla portugés), ohin.

Prezidente Partidu KHUNTO ne’e fó-sai katak, rezolusaun ne’e hasai hodi fó resposta ba ejizénsia Prezidente Repúblika, Francisco Guterres ‘Lú Olo’ nian, ne’ebé husu partidu polítiku sira-ne’ebé envolve iha koligasaun foun tenke prenxe rekezitu hodi realiza konferénsia ka kongresu ruma tuir lei partidu polítku nian.

Nia subliña, lideransa nasionál partidu KHUNTO ho hanoin ida-ne’ebé mak kle’an hodi deside no kolabora iha desizaun polítika nune’e kontribui hakotu impase polítika ne’ebé akontese iha rai ida-ne’e.

Tuir nia, impase polítika ne’ebé naruk lori ona konsekuénsia boot ba vida ekonomia ba povu nian iha Timor-Leste.

Nia hateten, desizaun ne’e foti bazeia rezolusaun númeru 4-Kongresu Nasionál Partidu KHUNTO ninian, hodi deside hamutuk ho CNRT, PD, UDT, Frente-Mudansa no PUDD.

“Ho objetivu finál hakotu impase polítiku no asegura estabilidade governativa iha rai doben Timor-Leste,” nia  hateten.

Notísia Relevante: Loron 6-8 Marsu, KHUNTO Sei Realiza Kongresu Nasionál

Jornalista : Evaristo Soares Martins

Editór       : Cancio Ximenes

1 KOMENTÁRIU

HAKEREK NO HATÁN

Please enter your comment!
Please enter your name here