DILI, 7 marsu 2020 (TATOLI)—Ohin, Partidu Congresso Nacional da Reconstrução de Timor (CNRT), hala’o konferénsia estraordinária hodi aprova rezolusaun únika hodi fó resposta ba ezijénsia Prezidente Repúblika, Francisco Guterres ‘Lú Olo’, nian iha kona-ba rekezitu balun ne’ebé koligasaun foun seidauk prenxe, iha enkontru ne’ebé koligasaun foun hala’o ho Prezidente Repúblika iha sesta (06/3/2020) horisehik.

Sekretáriu Meza Konferénsia Ekstraordinária Partidu CNRT, Adérito Hugo da Costa esplika, rezolusaun Únika/P.CNRT/Marsu/2020 hodi reafirma pozisaun ba rezultadu husi enkontru ho Lider nasionál, iha loron 10 fulan Fevereiru 2020 iha Palásiu Presidensial.

“Enkontru ne’ebé Prezidente Repúblika mak prezide no deklara ofisialmente hanesan tuir mai, eleisaun antesipada nu’udar rekursu ikus liu Partidu polítiku sira ne’ebé iha asentu parlamentár, buka halo movimentu polítiku hodi hetan solusaun ba impasse politiku ne’e no kontinua mantein Taur Matan Ruak nu’udar Primeiru-Ministru, to’o impase polítiku resolve,” dehan Sekretáriu Meza Konferénsia Nasionál, Adérito Hugo da Costa, liuhosi konferénsia imprensa ne’ebé hala’o iha sede CNRT, Bairro dos Grilhos, Dili, sábadu (7/3/2020). .

Nune’e mós, nia dehan, konsidera liuliu ba pedidu espesífiku husi Prezidente Repúblika iha loron 10 fulan Fevereiru 2020 kona-ba pontu rua (2), husi rezultadu enkontru ho Líder nasionál sira no konsidera ba desizaun Konferénsia Nasional Partidu Congresso Nacional para a Reconstrução de Timor (CNRT) iha loron 22 fulan Fevereiru 2018.

Hosi konferénsia ida ne’e, nia hateten, aprova Akordu ba akordu partidu polítiku ba fim eleitorál ho naran “AMP-ALIANSA MUDANSA BA PROGRESU”, Aliansa ne’ebé hakotu iha loron 30 hafoin Primeiru-Ministru toma pose.

Iha rezolusaun únika ne’e, nia hateten, konsidera mós ba akordu Politiku atu forma Aliansa Maioria Parlamentar (AMP) iha fulan Junu 2018 no konsidera tan deklarasaun Primeiru-Ministru VIII Governu Konstitusioná, nu’udar mos Prezidente PLP, iha loron 20 fulan Janeiru 2020 no loron 30 fulan Janeiru 2020 katak AMP la eziste ona.

CNRT, nia hatutan, konsidera mós ba submisaun karta pedidu demissaun husi Primeiru-Ministru, nu’udar mós Prezidente PLP ba Prezidente Republika iha loron 24 fulan Fevereiru 2020 no CNRT konsidera liuliu ba dispostu iha númeru 1 no 3 Artigu 9º, Lei No. 3/2004, 14 Abril, ne’ebé alterada ho Lei No. 2/2016, 3 de fevereiru kona-ba partidu polítiku.

Nia dehan, bazeia ba dispostu iha númeru 1, artigu 106º Konstituisaun Repúblika Demokratika Timor-Leste katak Primeiru-Ministru sei indijitadu husi Partidu mais votadu ka aliansa partidu polítiku sira ne’ebé iha Maioria Parlamentár.

Nune’e, nia haktuir, Konferênsia Nasional Partidu Congresso Nacional de Reconstrução de Timor-Leste iha nia sorumutu, iha loron 7 fulan Marsu tinan 2020, iha Sede Partidu CNRT, Bairro dos Grilos iha Dili, Timor-Leste, hodi haktuir dispostu iha alínea b), nú. 3, artigu 27° iha Estatutu Partidu CNRT no hodi kumpre ba dispostu iha nú. 1 artigu 106º, Konstituisaun Repúblika Demokratika Timor-Leste, delibera:

“Afirma vontade polítika Partidu CNRT atu responde ba rezultadu hosi enkontru líder nasionál, iha loron 10 fulan fevereiru 2020 no reafirma pozisaun partidu CNRT hodi mantein iha Aliansa Maioria Parlamentar (AMP) ne’ebé forma iha fulan juñu 2018. Aprova hamutuk ho partidu KHUNTO kompozisaun foun ba Aliansa Maioria Parlamentar, hodi akomoda vontade polítika ne’ebé espresa hosi Partidu Demokrátiku (PD), Partidu Unidade Dezenvolvimentu Demokrátiku (PUDD), Partidu União Demokrátika Timorense (UDT), Partidu Frente Mudansa (FM), atu hola parte iha Aliansa Maioria Parlamentar, hodi hamosu konjuntura politika foun atu bele hakotu impase polítiku ne’ebé akontese iha Timor-Leste,” nia dehan.

CNRT reafirma ninia apoiu totál ba deklarasaun konjunta, ne’ebé asina husi Prezidente Partidu FM, UDT, PUDD, PD, KHUNTO no CNRT, iha loron 22 fevereiru 2020, iha sede Partidu CNRT.

Notísia Relevante: CNRT Aprova Rezolusaun Únika hodi Responde ba Ezijénsia PR

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here