Partidu KHUNTO bainhira halo komferénsi imprensa relasiona ho sira-nia kongresu nasionál ne'ebé atu halo. Imajen TATOLI/Evaristo Martins

DILI, 3 marsu 2020 (TATOLI)—Partidu Kamanek Haburas Unidade Nasionál Timor Oan (KHUNTO) sei realiza Kongresu Nasionál iha loron 6-8 marsu 2020 iha Sentru Konvensaun Dili (CCD-sigla portugés) hodi hili sira-nia lideransa foun.

Kongresu Nasionál ne’e hala’o bazeia ba Despaisu husi Konsellu Nasionál Lideransa Partidu KHUNTO Nú. 25/KLN/P.KHUNTO/II/2020 kona-ba estabelesimentu Komisaun Organizadora Kongresu Nasional daruak Partidu KHUNTO nian ne’ebé sei organiza kongresu durante loron tolu.

Vise-Prezidente Partidu KHUNTO, António Verdiál de Sousa, esplika, estatutu Partidu KHUNTO hateten Katak Kongresu Nasional nu’udar órgaun aas liu iha partidu.

Tanba ne’e, nia dehan, objetivu prinsipál hosi kongresu nasionál daruak ne’e mak hodi defini vizaun, misaun, halo alterasaun ba estatutu no toma desizaun estratéjiku.

“Kongresu ne’e atu hili mós lideransa nasional partidu nian ba tinan haat mai (2020-2024). Kongresu ne’e ho tema sentrál ‘Hahoris no Fó Moris’ parseiru ba dezenvolvimentu no unidade nasionál,” Vise-Prezidente Partidu KHUNTO, António Verdiál de Sousa informa liuhosi konferénsia imprensa iha sede Partidu KHUNTO, Manleuana.

Nia informa, Kongresu Nasionál sei hala’o durante loron tolu iha Dili, nune’e konsellu nasionál lideransa determina kongresista no partisipante sira ne’ebe parisipa iha kongresu ne’e mai hosi estrutura nasionál, munisipál, postu administrativu, suku, aldeia no koordenadór munisipál 12 inklui RAEOA-Oecussi Ambeno hamutuk ema delegadu na’in 700.

Aleinde ne’e, partisipante sira mai hosi organizasaun filiadu sira hanesan Organizasaun Klibur Intelektuál no Profesionál (KIP), Organizasaun Klibur Feto KHUNTO (OKFK) no Organizasaun Juventude Partidu KHUNTO nian.

Nia dehan, observadór sira ne’ebé maka sei observa diretamente iha kongresu ne’e mak observadór nasionál, internasionál, partidu polítikus sira, ONG Nasionál no Internasioinaál, universitáriu sira, peritu lei nasionál no internasionál.

Tanba ne’e, nia husu ba kongresista sira ne’ebé sei halo deslokasaun hosi munisípiu mai Dili atu la’o ho disiplina, tenke kumpri ba lei no orden tránzitu nian. Durante viajen, nia husu,  labele halo “viva” tanba agora la’ós tempu kampaña.

“Husu ba militante Partidu KHUNTO hotu atu mantein pás no estabilidade, nune’e bele fó susesu ba segundu Kongresu hodi hili estrutura foun ba Tinan 2020-2024 nian,” nia apela.

Entretantu, atu halo kongresu nasionál hetan susesu, sira indika ona Marito Magno mak sai hanesan Prezidente Komisaun Organizadora.

Notísia Relevante: KHUNTO Prontu iha Kualker Situasaun Inklui EA

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here