DILI, 6 marsu 2020 (TATOLI)—Konselleiru Másimu Partidu Kmanek Haburas Unidade Nasionál Timor Oan (KHUNTO), José dos Santos Bucar “Naimori”, ohin, iha kongresu Nasionál Partidu KHUNTO ba daruak hodi dedika múzika espesiál ho títulu ‘Mate ka Moris Ita Hamutuk’ ba lider nasionál sira.

Naimori hateten, múzika ne’ebé nia dedika ba ne’e iha relasaun ho polítika atuál ne’ebé halo líder nasionál sira fahe-malu.

“Tanba ida-ne’e mak kanta ida ohin ne’e espesiál ba maun Xanana, maun Ramos Horta, maun Alkatiri, maun Lú Olo, maun Taur Matan Ruak no maun Lere Anan Timur ho nia alin sira seluk,” dehan Naimori iha ámbitu kongresu nasionál partidu KHUNTO nian ne’ebé partisipa hosi kongresista sira hamutuk ema na’in 700 iha Sentru Konvensaun Dili (CCD-sigla portugés), ohin.

Konselleiru Másimu KHUNTO ne’e hateten, KHUNTO fiar metin katak líder nasionál sira-nia lia-tatoli dehan “mate ka moris, ita hamutuk luta ba rai ida-ne’e”.

“Ami kontente ho ita-boot sira-nia luta tantu rai-laran no rai-li’ur maibé dalaruma ami mós fuan moras, fuan kanek no dodok tanba maun sira la lolo-liman ba malu. Tanba ema hotu ne’ebé didi’ak mate hotu ona, hela imi na’in hira de’it, oras ne’e hamutuk ho ami iha Timor-Leste,” nia hateten.

“Ami hakarak, imi tau iha imi-nia memória ida-ne’ebé di’ak ba ami atu nune’e ami kontinua temi imi-nia naran,” nia dehan.

Muzika  ‘Mate ka Moris Ita Hamutuk’ ne’e hakerek hosi  José dos Santos Bucar “Naimori” ne’ebe hananu husi banda múzika NARMA ne’ebé homan-tutan hosi naran rua mak “Naimori” no “Armanda”.

Entretantu, NARMA Band ne’e lidera hosi juventude partidu KHUNTO nian hamutuk ema na’in-15. Iha ámbitu kongresu ba daruak ne’e, grupu banda múzika ne’e maka anima kongresista sira ne’ebé hosi munisípiu 12 inklui RAEOA.

Hafoin banda múzika NARMA espresa múzika ne’e, Sekretáriu Jerál Partidu FRETILIN, Mari Alkatiri, hamriik hodi fó basa-liman daldala ba joven na’in-tolu ne’ebé lori ai-knananuk ne’e.

Muzika ne’e, tuir observasaun, bele halo kuadru partidu KHUNTO, Olinda Guterres, tanis no kongresista sira nonook lian laek hodi fó sira-nia atensaun ba joven na’in-tolu ne’ebe lori múzika refere.

Joven na’in-tolu hosi Banda Múzika NARMA ne’ebé lori-toka no hananu múzika refere mak hanesan Joni Osnaco, Eduardo Nunes no Elder da Costa.

Iha biban ne’e, Kordenadór NARMA Band, Joni Osnaco hateten, múzika ne’e sira foin simu hosi Konselleiru Másimu Naimori horisehik lorokraik hodi bele hananu iha kongresu ne’e.

“Ami foin simu horisehik lokraik no ohin ami bele lori múzika ne’e iha kongresu ne’e,” nia hateten.

Notísia Relevante: Loron 6-8 Marsu, KHUNTO Sei Realiza Kongresu Nasionál

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here