Xanana Gusmão dadalia hela ho partidu koligasaun foun. Imajen TATOLI/Antónia Gonçalves.

DILI, 06 marsu 2020 (TATOLI)–Rezultadu enkontru entre Koligasaun Foun ho Prezidente Repúblika (PR), Francisco Guterres “Lú Olo”, ohin, la’o di’ak tebes maibé Prezidente Repúblika rekomenda atu Koligasaun Foun presiza tan prenxe rekezitu balun hodi nune’e bele forma governu foun. 

“Prezidente Repúblika Francisco Guterres “Lú Olo” simu koligasaun nia dispozisaun ne’ebé maka hato’o iha karta ho intensaun atu bele halo formasaun Governu foun maibé tanba agora daudaun sei iha rekezitu balun ne’ebé mak presiza atu koligasaun prenxe. Tanba ida ne’e maka Prezidente Repúblika sei hakarak atu hatene di’ak liután no koligasaun rasik seidauk prenxe rekezitu sira ne’e balun. Tanba ida ne’e maka ami sei fila, depois maka koligasaun sei fó fila fali ami-nia resposta mai Prezidente Repúblika,” dehan  Sekretáriu Koligasaun Foun, António da Conceição, ba mídia hafoin halo audiénsia ho Prezidente Repúblika iha Palásiu Prezidénsia Repúblika Bairru-Pité, Dili, ohin.

Nia esplika liután, Prezidente Repúblika haree hosi karta ne’ebé koligasaun foun hato’o. Primeiru, nia dehan, iha aspetu polítiku  ninian koligasaun iha kondisaun tanba iha ona koligasaun entre partidu neen (6) hodi prenxe maioria parlamentár ninian.

Segunda, nia informa, kondisaun ne’ebé maka koligasaun tenke halo maka tuir lei partidu polítiku ne’e, tenke iha konferénsia ka iha kongresu. Ho baze ida ne’e maka Prezidente Repúblika husu hakarak atu hatene tan prosedimentu ida hodi lori to’o ba iha koligasaun.

“Tanba ne’e mak ami seidauk iha pozisaun atu hataan direta ba Prezidente Repúblika no koligasaun sei halo reuniaun fila fali, atu bele buka solusaun hodi prenxe rekezitu ne’ebé Prezidente Repúblika husu,” António subliña.

Kona-ba durasaun tempu, António dehan, la iha tempu fixa tanba tenke ba fila fali, PR Lú Olo asentua tebes ba nesesidade Orsamentu Jerál estadu ida ne’ebé mak tenke iha atu sustenta nafatin nesesidade atividade Governu ninian.

Ida ne’e, nia hatutan, hanesan rekezitu prinsipál ida no se iha formasaun Governu ida mós, Governu ida ne’ebé mak tenke garante duni ninia sustentabildade ba to’o rohan.

“Ne’e signifika katak, kondisaun sira ne’ebé mak ko’alia kona-ba rekezitu legál juridiku ninian presiza prenxe,” nia dehan.

Koligasaun foun ne’e lidera husi Prezidente CNRT, Kay Rala Xanana Gusmão, Prezidente PD, Mariano Assanami Sabino, Prezidente KHUNTO, Armanda Berta dos Santos, Prezidente Ein Ezersísiu UDT, Rudolfo Aprarício Guterres, Prezidente Interinu FM, Egídio de Jesus, no Prezidente PUDD, António de Sá Benevides.

Notísia Relevante: Xanana To’o iha Palásiu Prezidente-Repúblika iha Tuku 9:00

Jornalista : Cipriano Colo

Editór       : Cancio Ximenes

HAKEREK NO HATÁN

Please enter your comment!
Please enter your name here