Porta vos Koligasaun foun, António da Conçeição ‘Kalohan'. Imajen/ António Gonçalves

DILI, 06 marsu 2020 (TATOLI)—Sekretáriu Jerál Partidu Demokrátiku (PD), António da Conçeição ‘Kalohan’ hateten, ohin, koligasaun foun seidauk bele aprezenta proposta Primeiru Ministru (PM) foun ba Prezidente Repúblika, Francisco Guterres ‘Lú Olo’ tanba falta rekezitu balun.

“Ohin, seidauk bele aprezenta proposta Primeiru-Ministru foun ba Prezidente Repúblika tanba artigu 9 hosi lei partidu polítiku nian koligasaun seidauk prenxe. Atu prenxe kritériu ne’e fásil hela. KHUNTO halo hela kongresu hasai rezolusaun ida KHUNTO nian ramata, PD halo tiha ona, CNRT mak prezidente koligasaun, CNRT laiha difikuldade atu halo aktu ida-ne’e,” dehan  Sekretáriu Jerál Partidu Demokrátiku (PD), António da Conçeição ‘Kalohan’ a jornalista sira iha Sentru Konvensaun Dili (CCD-sigla portugés), ohin.

Nia dehan, sertamente kuandu koligasaun ida atu forma Governu tenke ser iha nia ulun no ulun ne’e mak Primeiru-Ministru. Maibé, tuir nia, ida-ne’e preparadu hotu ona mibé hela de’it rekezitu ida mak konferénsia ne’ebé kada partidu sei presiza halo hodi bele konfirma koligasaun.

Sekretáriu Jerál PD ne’e hateten, Partidu Demokrátiku konkorda kualkér figura bele okupa kargu Primeiru-Ministru, importante mak estadu ne’e tenke moris ho orsamentu.

“Objetivu PD nian atu viabiliza governasaun ida hodi iha Orsamentu Jerál Estadu. Ba ami, ema ne’e la importante,” nia dehan.

Antes ne’e, Xefe Bankada Parlamentár CNRT, Duarte Nunes, fó-sai ona katak sorumutu entre xefe estadu ho koligasaun sei aprezenta hodi indijita Primeiru-Ministru foun.

Notísia Relevante: Koligasaun Foun La Presiza Realiza Konferénsia Konjunta

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here