Xefe Bankada Partidu Demokrátiku (PD), António da Conçeição ‘Kalohan'. Imajen/ Egas Cristovao

DILI, 6 marsu 2020 (TATOLI)—Sekretáriu Jerál Partidu Demokrátiku (PD), António da Conçeição “Kalohan” hateten, koligasaun foun ne’ebé forma hosi partidu neen (6) la presiza halo konferénsia no kongresu konjunta maibé partidu ida-idak mak halo.

Kalohan dehan, Partidu Demokrátiku (PD) halo ona no hela de’it partidu lima hanesan CNRT, KHUNTO, UDT, Frente-Mudansa no PUDD seidauk halo.

“Koligasaun la presiza halo konferénsia ka kongresu hamutuk maibé kada partidu koligasaun ida-idak mak halo. Ita la presiza halo kongresu boot hanesan KHUNTO halo daudaun ne’e. Konferénsia ne’e ema na’in-rua ka tolu mós bele halo ona,” nia dehan ba jornalista sira, iha Sentru Konvensaun Dili (CCD-sigla portugés), sesta ne’e.

Nia haktuir, Prezidente Repúblika haree dehan katak politikamente koligasaun ida-ne’e prenxe rekezitu tanba bele ona iha maioria parlamentár atu asegura governasaun ida.

“Kestaun seluk Prezidente Repúblika fó nota koligasaun rasik buka mekanizmu ida atu prenxe maka kestaun prosesu legál ninian, ne’ebé rekere katak lei partidu polítiku artigu 9 nian, ne’ebé ko’alia kona-ba bainhira partidu polítiku sira atu tama ba koligasaun ruma tenke ser halo liuhosi konferénsia ka kongresu,” nia dehan.

Tanba ne’e, xefe estadu husu partidu sira ne’ebé hamutuk iha koligasaun presiza haree fali konferénsia ka kongresu nune’e bele prenxe kritéria ida ne’ebé mak lei husu ne’e.

“Ohin, opurtunidade ida tanba KHUNTO halo nia kongresu, sertamente KHUNTO mós sei hola desizaun ida-ne’e. Enkuantu partidu sira seluk tenta organiza ona nune’e bainhira sira finaliza ona konferénsia hodi hasai desizaun ida depois desizaun ida-ne’e, ami bele halo fali karta foun ba Prezidente Repúblika hodi dehan katak ami prontu ona no ami atu forma governu,” nia hateten.

Sekretáriu Jerál PD ne’e subliña, xefe estadu mós konsidera koligasaun ne’e tenta atu fó resposta ba desizun ne’ebé líder nasionál sira hamutuk ho prezidente hasai.

“Espresaun ne’ebé prezidente ko’alia maka prezidente halo nafatin nia referénsia hodi husu ba koligasaun tetu tuir saida mak kada partidu polítiku ba ko’alia iha enkontru ho Prezidente Repúblika,” nia esplika.

Notísia Relevante: Alkatiri Konsidera Preokupasaun PR Lú Olo ba Koligasaun Foun Razoável

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here