Ministru Obra Públika, Salvador Eugénio Soares dos Reis Pires. Imajen TATOLI/António Gonçalves

DILI, 28 outubru 2019 (TATOLI) – Atu hasa’e prestasaun servisu Eletricidade de Timor-Leste (EDTL) no Diresaun Jerál Água no Saneamentu (DGAS-sigla portugués), Ministériu Obra Públika (MOP) oras ne’e daudaun prepara ona lejizlasaun atu avansa ba prosesu transformasaun ba Empreza Públika (EP).

Ministru Obra Públika, Salvador Eugénio Soares dos Reis Pires, hateten transformasaun ne’e tanba atu aumenta reseita ba kofrEstadu no mós hasa’e volume fornesimentu eletrisidade no bee ba povu iha territóriu.

Notísia Relevante: MOP Prepara Hela Lei Transforma EDTL Sai EP

“Dekretu lei nia draft (esbosu) prepara ona no sei halo estudu iha tinan ne’e hodi hatene impaktu no análiza ekonómiku. Ami mós sei aprezenta ba Konsellu Ministru hodi transforma EDTL no mós Diresaun Jerál Água no Saneamentu ba Empreza Públika”, tenik Ministru Salvador iha audiénsia konjunta Komisaun C,D,E no F, iha sala plenáriu, segunda ne’e.

Tuir governante ne’e, diresaun rua ne’e presiza muda ba EP hodi bele fó atendimentu di’ak ba públiku.

Ministru ko’alia asuntu ne’e tanba Deputadu Bankada CNRT, Domingos de Carvalho preukupa ho eletrisidade ne’ebé mate lakan, liuliu parte Aileu nian ne’ebé sempre mate hela de’it.

Biban ne’e, Ministru Salvador rekoñese problema eletrisidade durante ne’e, tanba ne’e nia konsidera presiza transforma ba EP atu funsionáriu sira bele halo atendimentu di’ak liu ba públiku.

Antes ne’e, governante ne’e dehan populasaun pursentu 83 ona maka asesu ona ba eletrisidade, tanba ne’e presiza prestasaun servisu di’ak atu bele rezolve fornesimentu liña eletrisidade  ba povu.

Ba asuntu ida-ne’e. parte MOP halo ona enkontru ho Komisaun Funsaun Públika hodi buka solusaun ba destinu Funsionáriu Públiku ne’ebé servisu iha EDTL.

Bainhira tempu ne’e to’o, sei oferese opsaun rua ba funsionáriu sira hotu atu hili, mantein estatutu hanesan Funsionáriu Públiku ka rezigna-aan hodi sai nu’udar Funsionáriu Empreza.

Agora daudaun, iha Funsionáriu Públiku na’in-500 resin maka serbisu iha EDTL, iha área tékniku no administrasaun.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here