Diretór Ezekutivu SERVE, Florêncio Sanches. Imajen TATOLI/António Gonçalves

DILI, 06 marsu 2020 (TATOLI) – Diretór Ezekutivu Servisu Rejistrasaun no Verifikasaun Emprezariál (SERVE), Florêncio Sanches, konfirma katak nia parte simu ona dokumentu husi empreza Aviaun Batik Air hodi halo operasaun voo iha Timor-Leste, maibé sei presiza hadi’a buat balun.

“Sim iha loron hirak liubá, na’in Batik Air husi Jakarta, Indonézia rasik mai hasoru ha’u no sira submete ona dokumentu atu aviaun bele halo operasaun iha Timor-Leste”, tenik Florêncio Sanches ba Agência Tatoli iha ninia knaar fatin, Palm Bussiness, Hudi-Laran, sesta ne’e.

Maski nune’e, Dirijente ne’e akresenta, empreza aviaun ne’e presiza hadi’a dokumentu balun tuir rekezitu SERVE nian.

“Ami simu ona sira-nia dokumentu no tuir lei SERVE halo ona verifikasaun, maibé iha dokumentu tolu ne’ebé sira presiza submete maibé sei sala. Tanba ne’e, ami husu empreza atu lori filafali dokumentu hodi hadi’a”, nia akresenta.

Notísia Relevante: Responsável Batik Air Hasoru Ona Ministru José Agustinho Hodi Ko’alia Operasaun

Florêncio Sanches esplika liután, dokumentu tolu ne’ebé sala maka hanesan dokumentu diresaun halo atividade operasaun iha Timor-Leste, ne’ebé tenke tau diresaun iha Timor-Leste maibé empreza Batik Air tau fali sira nia diresaun iha Jakarta, Indonézia, entaun presiza hadi’a.

Dokumentu seluk ne’ebé SERVE konsidera presiza hadi’a maka seidauk iha karta rezolusaun ida husi Konsellu Administrasaun Batik Air nian husi Jakarta, ne’ebé deside hodi autoriza aviaun ne’e mai halo operasaun iha Timor-Leste.

“Dokumentu ida-ne’e mós parte ida SERVE konsidera importante tebes”, nia dehan tan.

Dokumentu seluk husi empreza Batik Air ne’ebé  SERVE konsidera presiza hadi’a tan maka, Batik Air rasik seidauk konsege nomeia ema-ruma atu mai reprezenta sira iha Timor-Leste.

“Maibé sira prontu tebes atu halo investimentu nu’udar operadór foun iha parte aériu ninian, ne’ebé atu liga ba Indonézia”, Florêncio esplika tan.

Tuir nia katak, empreza aériu ne’e rasik promete sei hadi’a dokumentu tolu ne’e no sei mai aprezenta iha SERVE tanba sira rasik dehan hakarak aselera trata dokumentu.

“Maibé, ami mós dehan ba sira katak molok atu  halo legalizasaun ba dokumentu sira, empreza ne’e tenke iha Timor-Leste hodi halo operasaun iha áre aériu no tenke liuhosi ita-nian Embaxada iha Jakarta atu sertifika lalais. Nune’e, kuandu sira mai iha SERVE, iha másimu loron-lima dei’t prosesu bele ramata no Batik Air rasik bele halo ona operasaun iha Timor-Leste”, nia subliña.

Nune’e, Diretór Ezekutivu ne’e garante katak Batik Air rasik sei finaliza sira-nia lisensa negósiu iha SERVE iha fulan-ne’e nia laran no bele halo lansamentu voo dahuluk iha tempu badak. Tanba tuir SERVE nian haree katak empreza ne’e iha kompromisu maka’as atu halo operasaun aériu iha Timor-Leste.

Entretantu, empreza aviasaun ne’ebé atu halo operasaun iha Timor-Leste presiza kumpre dekretu-lei tolu hanesan Dekretu-Lei númeru 16/2017, ne’ebé ko’alia kona-ba rejistu komersiál, lei númeru 10/2017, sobre sosiedade komersiál no Dekretu-Lei númeru 34/2016, kona-ba ezerse atividade ekonómika.

Nune’e mós, Dekretu-Lei númeru 16/2017, kona-ba rejistu komersiál, katak entidade ne’ebé maka halo atividade komersiál iha territóriu Timor-Leste tenke rejistu atividade ekonómika, maibé bainhira laiha maka dekretu ne’e sei fó biban ba empreza atu selu multa $5.000.

Ikus liu, Dekretu-Lei númeru 10/2017, kona-ba sosiedade komersiál, oinsá ema atu harii nian firma (kompañia) ida iha territóriu tomak, nia tenke hili hodi rejistu nia Kompañia Unipessoal, ka Lda no seluk tan, inklui Dekretu-Lei númeru 34/2016, kona-ba ezerse atividade ekonómika bainhira empreza harii ona.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here