Prezidente Autoridade Avisaun Sivíl Timor- Leste, Ana Rosália Ximenes Varela. Imajen Tatoli/Natalino Costa

DILI, 05 marsu 2020 (TATOLI) – Prezidente Autoridade Aviasaun Timor-Leste (AACTL,sigla portugés), Ana Rosália Ximenes Varela, informa responsável empreza Aviaun Batik Air hasoru ona Ministru Transporte no Komunikasaun, José Agostinho da Silva, hodi ko’alia kona-ba opersaun aviaun orijin husi Indonézia ne’e.

“Foin daudaun, na’in ba Aviaun Batik Air mai hasoru ona Ministru Transporte no Komunikasaun iha gabinete ministru, hodi hahú ko’alia kona-ba sira nian operasaun iha Timor-Leste”, dehan Ana Rosália ba Agência Tatoli iha ninia knaar fatin, Caicoli, kinta ne’e

Nia realsa, iha sorumutu entre responsável Aviaun Batik Air ho Ministru José Agostinho, aprezenta sira ninia prontudaun atu aviaun ne’e bele halo operasaun iha Timor-Leste, tanba haree ba rekezitu kona-ba dokumetu kompletu ona, falta lisensa negósiu husi Servisu Rejistrasaun no Verifikasaun Emprezariál (SERVE) maka seidauk iha.

“Ministru informa ona mai ami (AACTL) katak, empreza Aviaun Batik Air rasik, ninia dokumentu kompletu ona, maibé lisensa negósiu husi SERVE maka seidauk, maibé sira promete sei kompleta rekezitu iha tempu badak”, nia akresenta.

Prezidente AACTL subliña, sei fó lisensa semo ka flight approval ba kualkér aviaun ne’ebé maka atu halo operasaun iha Timor-Leste, maibé tenke kumpre rekezitu sira ne’ebé estabelese ona.

“Ami nu’udar autoridade aviasaun sivíl Timor-Leste, sei fó lisensa ba iha aviaun sira ne’ebé maka hakarak halo opersaun Timor-Leste kuandu sira prense ona rekezitu husi AACTL” dehan Ana Rosália.

Nia haktuir, Aviaun Batik Air rasik promete, sei hahú halo asesmentu hamutuk ho Autoridade Aviasaun hodi haree posibilidade balun ne’ebé liga ho atividividade operasaun iha Timor-Leste.

“Bazeia ba enkotru foin daudaun ho Ministru katak sira sei filafali mai Timor-Leste iha tempu  badak. Ida-ne’e hodi hamutuk ho ami hahú haree ba kestaun asesmentu, liuliu ba Batik Air nian operasaun, tanba asesmentu ida-ne’e presiza tebes”, nia afirma.

Ana Rosália esplika liután katak, asesmentu ne’e sei haree liu ba kestaun aeroportu nian katak empreza sei foka ba kondisaun aeroportu nian, nune’e bainhira AACTL no empreza Batik Air iha ona asesmentu ne’e rasik sei ko’alia mós kona-ba oráriu voo Batik Air iha Timor-Leste no kona-ba kategoria atu sai nu’udar Charter Flight ka Regular Flight.

“Kestaun sira-ne’e maka ami sei haree hodi ko’alia iha asesmentu no bainhira ko’alia ho Ministru, sira promete tempu badak sei mai hodi finaliza prosesu sira no hahú halo sira ninia atividade operasaun”, nia realsa.

Antes ne’e, Aviaun Batik Air tuir planu sei lansa voo dahuluk iha 15 fevereiru 2020, maibé tanba seidauk prense rekezitu mak voo ne’e pendente.

Jornalita: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here