Xefe Bankada CNRT, Duarte Nunes. Imajen/Egas Cristovão

DILI, 5 marsu 2020 (TATOLI)—Xefe Bankada Parlamentár CNRT, Duarte Nunes hateten, haree ba konjuntura polítika atuál koligasaun foun mak sei determina kompozisaun meza Parlamentu Nasionál.

Na hatutan, bainhira ezisténsia koligasaun foun ne’ebé lidera hosi partidu Congresso Nacional da Reconstrução de Timor (CNRT) hetan konsentimentu hosi Prezidente Repúblika, posibilidade kompozisaun meza Parlamentu Nasionál (PN) atuál troka tanba Partidu Libertasaun Populár (PLP) deside lakohi hamutuk ho CNRT.

“Ema halo koligasaun foun entaun fatin sira-ne’ebé ké iha koligasaun nia membru tama. Dalaruma bele akontese destituisaun. Se iha ema para troka, ita halo eleisaun foun. Ema halo koligasaun para asegura votu ne’ebé iha koligasaun tanba koligasaun foun ho kadeira 34 ne’e maioria,” dehan Deputadu Duarte Nunes, ba jornalista sira, iha resintu Parlamentu Nasionál.

Tanba, nia infroma, Kompozisaun meza atuál, Prezidente Parlamentu Nasionál, Arão Noé de Jesus da Costa Amaral hosi CNRT, Primeiru Vise-Prezidente Parlamentu Nasionál, Maria Angelina Sarmento hosi PLP, Segundu Vise Prezidente Parlamentu Nasionál, Luis Roberto hosi KHUNTO, Sekretária Meza PN, Maria Terezinha da Silva Viegas hosi CNRT no Vise-Sekretária, Isabel Maria Barreto Freitas Ximenes hosi UDT/FM.

Entretantu, Deputadu Bankada Parlamentár Partidu Demokrátiku (PD), Adriano do Nascimento hateten, defaktu rejimentu fó dalan no defaktu Aliansa Mudansa Ba Progresu (AMP) fahe-malu no Primeiru-Ministru mós hato’o karta demisaun.

“Segundu iha tán koligasaun foun ida, aban atu hasoru malu ho Prezidente Repúblika. Ne’ebé, esperiénsia no prátika mosu iha parlamentu uluk 2016 laiha anin no udan maibé CNRT hasai PD, hasai ha’u hosi vise-prezidente, hasai CNRT nia ema Vicente Guterres, muda meza ne’e ho fásil. Ia tempu ne’ebá koligasaun foun laiha, CNRT mesak ukun to’o hotu. Ba Ha’u dalan iha ona sá tán agora iha koligasaun foun. Agora, ita hein de’it desizaun Prezidente Repúblika.” Adriano hateten.

Deputadu Adriano subliña, iha tinan 2016 situasaun polítika la to’o Prezidente Repúblika maibé CNRT halo destituisaun hasoru meza PN hodi hili meza foun.

“Ne’ebé, faktu mak ne’e. Maibé kazu agora iha Prezidente Repúblika nia liman. Uluk, sein prezidente mós ema halo. Agora ne’e ho prezidente, ne’ebé ita rona lai Prezidente Repúblika,” nia dehan.

Koligasaun foun ne’e kompostu hosi partidu CNRT, PD, KHUNTO, UDT, FM no PUDD. Purtantu PLP no FRETILIN posibilidade ba opozisaun iha situasaun polítika atuál.

Notísia Relevante: Semana Ne’e, Xanana Sei Lidera Koligasaun Foun Hasoru PR Lú Olo

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here