Xefe Bankada CNRT, Duarte Nunes. Imajen/Egas Cristovão

DILI, 04 marsu 2020 (TATOLI)—Prezidente Partidu Congresso Nacional de Reconstrução de Timor (CNRT), Kay Rala Xanana Gusmão sei lidera koligasaun foun hasoru Prezidente Repúblika, Francisco Guterres ‘Lú Olo’ hodi ko’alia kona-ba destinu koligasaun foun.

“Koligasaun foun preparadu ona no husu ona atu audiénsia ho Prezidente Repúblika. Nia (Xanana) mak sei bá tanba ne’e parte hosi koligasaun. Se nia la bá koligasaun la kompletu,” Xefe Bankada Parlamentár CNRT, Deputadu Duarte Nunes, informa ba jornalista sira iha resintu Parlamentu Nasionál, kuarta ne’e.

Nia dehan, objetivu audiénsia koligasaun foun ho Xefe Estadu ne’e hodi ko’alia kona-ba indijita Primeiru-Ministru foun.

“Lista ne’e só sai kuandu Prezidente Repúblika dekreta ona Primeiru-Ministru depois mak forma nia Governu. Ha’u rona dehan sesta mak bá hasoru Prezidente Repúblika, karik aproveita aprezenta indijita Primeiru-Ministru foun,” nia informa.

Nia dehan, karta koligasaun foun ne’ebé aprezenta ba Xefe Estadu iha loron 27 fevereiru ne’e husu atu indijita Primeiru-Ministru foun.

Duarte Nunes mós lakohi fó-sai figura ne’ebé koligasaun foun propoin sai Primeiru-Ministru foun ba Prezidente Repúblika tanba sei hein desizaun Xefe Estadu.

Notísia Relevante: PM Taur Aprezenta Ona Karta Demisaun

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here