Sekretária Estadu ba Igualdade no Inkluzaun, Maria José da Fonseca Monteiro de Jesus.Imajen/Tatoli/Eugénio Pereira

DILI, 05 marsu 2020 (TATOLI)–Governu liuhosi Sektretária Estadu ba Igualidade no Inkluzaun (SEII) hamutuk ho Uniaun Europeia (UE) no Organizasaun Nasaun Unida (ONU-sigla portugés) hala’o lansamentu ba Inisiativa Spotlight atu hakotu Violénsia hasoru feto no labarik feto sira iha Timor-Leste.

Sektretária Estadu ba Igualidade no Inkluzaun (SEII), Maria José  da Fonseca Monteiro de Jesus hateten, Inisiativa Spotlight ne’e ho objetivu atu halakon forma oin-oin husi violénsia hasoru feto no labarik-feto iha tinan 2030 be mai.

Nia dehan, violasaun hasoru feto no labarik-feto hanesan violasaun direitu umanu ne’ebé boot liu ne’ebé kontinua akontese no fó problema ba mundu inklui Timor-Leste.

“Ida ne’e hanesan dezafiu prinsipál ida ba iha realizasaun dereitu husi feto no labarik-feto sira atu atinji Objetivu Dezenvolvimentu Sustentavel (ODS),” dehan SEII, Maria José da Fonseca Monteiro de Jesus, liuhosi konferensia imprensa ne’ebé hala’o iha Hotel Timor, Dili, ohin.

Nia hatutan, Timor-Leste hanesan nasaun ida ne’ebé hetan benefísiu husi Inisiativa Spotlight ho apoiu husi Governu, Sosiedade sivil, nune’e mós parseiru sira ne’ebé mak atu halakon Violénsia hasoru feto no labarik-feto sira.

“Atinji progresu signifikante iha tinan 20 nia laran hafoin vota ba istóriku ukun rasik-aan, Timor-Leste hatudu ona ninia kompromisiu atu hakotu violénsia hasoru feto no labarik-feto sira no violénsia parseiru íntimu,” nia dehan.

Aleinde ida ne’e, nia dehan, tuir vizaun ba igualdade hateten violénsia hasoru feto no labarik-feto sei sai nafatin obstákulu ho estimasaun 38% to’o 50%, feto sira hetan violénsia iha sira-nia moris tomak.

“Ha’u apresia tebes ba Inisiativa Spotlight ne’e, ne’ebé aliña ho kompromisiu Governu Timor-Leste atu promove no proteje dignidade direitu feto nian,” nia hateten.

Iha Timor-Leste, nia esplika, Governu fó prioridade no importánsia liu ba prevensaun, protesaun no protesaun serbisu hamutuk ho esforsu sira ba asegura hasa’e kbiit ekonomia no partisipasaun feto iha aspetu hotu iha sosiedade nian.

“Governu Timor-Leste Komprometidu tebes ba zero toleránsia hasoru forma oin-oin no tipu violénsia saida de’it hasoru feto no labarik-feto sira,” nia dehan.

Lansamentu Ofisiál ne’e, tuir nia, hanesan faze dahuluk husi inisiativa spotlight ne’ebé sei hala’o uluk iha Prioridade Munisípiu Tolu, Baucau, Ermera, no Viqueque.

Programa ne’e, nia haklaken, ho objetivu atu apoiu sasukat sira iha Governu nian atu halakon forma hotu husi prátika perigu ba violénsia hasoru feto no labarik-feto sira.

Entretantu, Embaixadór Uniaun Europia ba Timor-Leste, Andrew Jacobs hateten, investimentu tinan tolu husi inisiativa spotlight iha Timor-Leste total orsamentu hamutuk millaun $15.

“Objetivu mak atu hametin enkuadramentu legál nasaun no instituisaun sira no halo pormosaun ba norma pozitivu sosiál nian, hasa’e asesu hodi apoia serbisu ba sobrevivente husi violénsia, hadi’ak kolesaun no utilizasaun dadus ba iha halo pilítika ne’ebé di’ak liu no hametin parseira ho organizasaun sosiedade sivíl sira,” nia hateten.

Nia infroma, Uniaun Europia kontente bainhira programa Spotlight bele involve ema hotu hodi nune’e bele hakotu violénsia hasoru feto no labarik feto sira iha Timor-Leste.

“Uniaun Europia kontente tebes tanba atu apoiu esforsu Timor-Leste, nune’e halakon perigu sira husi violénsia boot hasoru feto no labarik feto sira. Tanba ne’e, itaeinvolve ema hotu inklui mane no labarik mane, kuandu laiha sira ita sei la susesu,” nia esplika.

Lansamentu ba inisiativa Spotlight atu hakotu Violénsia hasoru feto no labarik-feto iha iha Timor’Leste ne’e lidera husi UN Women, Programa Nasaun Unida Dezenvolvimentu (PNUD-sigla inglés), Organizasaun Nasaun Unida ba Labarik (UNICEF-sigla inglés), UNFPA no Internasionál Labour Organization (ILO-sigla inglés).

Notísia Relevante: Aban, TL Sei Selebra Loron Feto Internasionál iha Ermera

Jornalista : Osória Maques

Editór     : Cancio Ximenes

HAKEREK NO HATÁN

Please enter your comment!
Please enter your name here