Membru PN hosi Bankada PD, António da Conceição ‘Kalohan'. Imajen TATOLI/António Gonçalves

DILI, 3 marsu 2020 (TATOLI)—Sekretáriu Jerál Partidu Demokrátiku (PD), António da Conçeição “Kalohan” hateten, Prezidente Koligasaun Foun, Kay Rala Xanana Gusmão, konfirmadu ona aprezenta ezisténsia koligasaun foun ba Prezidente Repúblika, Francisco Guterres “Lú Olo”, iha sesta-feira aban.

Sekretáriu Jerál Partidu Demokrátiku, António da Conçeição hateten, koligasaun foun ne’e preparadu ona atu hasoru Prezidente-Repúblika, Francisco Guterres “Lú Olo”.

Karta hosi koligasaun foun ne’e aprezenta ba Gabinete Prezidénsia Repúblika kona-ba husu audiénsia submete iha semana kotuk.

Kalohan dehan, loloos ohin (kuarta) ne’e mak koligasaun foun ba hasoru malu ho Prezidente-Repúblika, Francisco Guterres “Lú Olo” maibé tanba sirkunstánsia sira hanesan komemorasaun loron nasionál veteranu entaun adia ba sesta (6/3/2020) aban.

“Ohin, konfirmasaun fila-fali hosi Palásiu Prezidente Repúblika ninian husu atu informa ba membru koligasaun sira hotu kona-ba enkontru ne’ebé sei realiza ho señor Prezidente Repúblika. Hosi Gabinete konfirma atu enkontru ne’e sei realiza iha sesta feira, tuku 09.30 no Maun Boot Xanana Gusmão sei aprezenta ezisténsia koligasaun ne’e,” Sekretáriu Jerál PD ne’e informa liuhosi konferénsia imprensa iha sede PD, Kolmera, Dili.

Kalohan dehan, intensaun enkontru ho xefe estadu atu halo aprezentasaun ofisiál ba Prezidente Repúblika katak iha ona koligasaun foun ida hanesan aktu ba materializasaun reuniaun líder nasionál sira ne’ebé mak realiza iha loron 10 fevereiru.

“Segundu aprezenta mós espetativa públiku ninian ne’ebé durante ne’e hein katak Maun Boot Kay Rala Xanana Gusmão sei bele hasoru malu ho Prezidente Repúblika. Ida ne’e mós opurtunidade ida ne’ebé mak maun boot lidera koligasaun hodi ba hasoru malu ho señor Prezidente-Repúblika,” nia dehan.

Kona-ba desizaun sira oinsá, nia hateten, ita hein kuandu koligasaun ba hasoru malu ho Prezidente Repúblika, sertamente iha ne’ebá mak sei iha fali komunikadu kona-ba konteúdu enkontru ne’e rasik.

Hanesan Prezidente Koligasaun, nia infroma, maun Xanana hola responsabilidade lidera ekipa ba hasoru malu ho Prezidente Repúblika”.

Kalohan afirma, maske PD partidu kiik maibé loke de’it dalan, la’ós PD mak determina iha formasaun koligasaun ida-ne’e maibé tanba vontade di’ak hosi Xanana Gusmão atu-bele repoin fila-fali normalidade ba situasaun no repoin fila-fali konfiansa ba populasaun tomak.

Nune’e mós, nia hatutan, repoin fali setór privadu nasionál ne’ebé ohin loron hasoru hela dezafiu barak tanba ne’e mak Maun Boot sente devér morál atu halo buat ruma ba nasaun hodi repoin normalidade ida-ne’e.

“Ida-ne’e mak ha’u hanoin objetivu prinsipál ne’ebé koligasaun ida-ne’e halo ho intensaun atu fó resposta ba situasaun ida-ne’ebé mak ita hasoru hela daudaun,” nia dehan.

Tuir nia, ne’e hanesan xamamentu polítiku no xamamentu ba nasaun ninian, dezde harii partidu tenke hola nafatin responsabilidade, atu-bele fó resposta ba vida nasaun ninian no vida povu ninian.

Sekretáriu Jerál PD ne’e dehan, kona-ba lista membru governu ne’e kestaun sekundáriu maibé kesatun prinsipál maka objetivu estratéjiku ne’ebé mak tenke ser hamosu koligasaun ida hodi bele fó resposta ba situasaun atuál.

“Proposta atu propoin Primeiru-Ministru foun ne’e iha maibé la’ós oportnuidade atu pronunsia bainhira Prezidente Repúblika seidauk iha konsentimentu ka aseitasaun ida ba ezisténsia ba koligasaun ne’e rasik maibé kuandu hamosu koligasaun ida sertamente tenke iha Primeiru Ministru ida. Figura ne’e ita labele halo espekulasaun, maibé sertamente koligasaun ne’e garante hakotu impase polítiku,” nia informa.

Notísia Relevante: Semana Ne’e, Xanana Sei Lidera Koligasaun Foun Hasoru PR Lú Olo

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here