Komandante Polisia Munisípiu Dili, Superintendente Xefe, Armando Monteiro ho Segundu Komandante Superintendente Asistente, Euclides Belo, halo hela negosiasaun ho lideransa UNIJMA, Gil Fernandes kona-ba disputa rai iha eis Sede CPD-RDTL atuál Eskuadra Polisia Na'in Feto Balidi, Dili. Imajen/Eugénio Pereira

DILI, 04 marsu 2020 (TATOLI) — Komandu Polisia Nasionál Timor-Leste (PNTL) Munisípiu Dili seidauk bele entrega rai no sede eis CPD-RDTL ba grupu Uniaun Nasionál Juventude Maubere (UNIJMA).

Notísia Relevante : Governu Sei La Entrega Eis Sede CPD-RDTL Ba UNIJMA

Iha tinan 2015, Governu liuhosi Ministériu Justisa (MJ) entrega tiha ona rai no sede refere ba Komandu PNTL Munisípiu Dili hodi utiliza nu’udar Eskuadra Polisia Na’in Feto, Balidi, Dili.

Komandante Polisia Munisipiu Dili, Superintendente Xefe Armando Monteiro,  klarifika ba membru UNIJMA tomak ne’ebé lidera hosi ativista eis CPD-RDTL, Gil Fernandes, katak, PNTL okupa rai bazeia ba desizaun Governu Timor-Leste ne’ebé hetan legalidade hosi Ministériu Justisa iha tinan 2015.

“Komandu PNTL Munisipiu Dili iha dokumentu ida maka ami uza fatin ne’e tuir desizaun tribunál nian,” dehan Armando Monteiro.

Parte seluk, Komandante Jerál Polisia Nasionál Timor-Leste (PNTL), Faustino da Costa mós reforsa tan katak, PNTL mantein uza eis Sede CPD-RDTL, Balidi, Dili, tanba Sekretáriu Estadu Terras no Propriedade (SETP), Mário Ximenes rasik deklara ona katak, estatutu rai iha Balidi ho dokumentu kompletu nu’udar patrimóniu estadu nian.

“Iha 2015 PNTL hetan despaxu de konsensasaun de uzu hosi Sekretáriu Estadu Terras no Propriedade iha momentu ne’ebá katak, atribui ba PNTL. Tanba ne’e, ohin, ha’u orienta ona Komandu Munisipiu Dili para ita hatudu dokumentu provas sira ne’e ba parte Advogadu no parte husi CPD-RDTL/UNIJMA,” afirma Komisáriu Faustino da Costa.

Iha parte seluk, Advogadu UNIJMA hosi Fundasaun Lia Loos, Marito Saldanha, promete sei lori fali kazu ne’e ba Ministériu Públiku no Tribunál hodi haree ninia baze legál.

“Ami sei lori fali prosesu problema ba Tribunál no Ministériu Públiku para buka hetan fila-fali ninia desizaun loloos maka ita husu PNTL atu foti sira nia sasán sai,” Marito Saldanha hateten.

Tuir observasaun Ajénsia Tatoli nian katak, asaun ne’ebé parte UNIJMA halo lidera husi Gil Fernandes Costa ho PNTL la mosu problema ruma mezmu iha diskusaun uitoan entre parte rua.

 Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here