Sekretáriu Estadu Terras no Propriedades (SETP), Mário Ximenes. Imajen/ António Goncalves.

DILI, 24 fevereiru 24 2020 (TATOLI)-Sekretáriu Estadu Terras no Propriedade (SETP), Mário Ximenes afirma, governu sei la entrega rai no edifísiu eis sede CPD-RDTL atuál Eskuadra Polisia Na’in Feto, Balidi, Dili, ba Uniaun Nasionál Juventude Maubere (UNIJMA).

Sekretáriu Estadu, Mário Ximenes katak, governu halo ona analiza ba estatutu rai iha Balidi ho dokumentu kompletu katak, rai ne’e nu’udar patrimóniu estadu nian.

“Estatutu rai ne’e estadu, la’ós rai privadu. Agora atu fó fali UNIJMA ou la fó ka ne’e buat kestaun ketak, ita tenke haree lai rai ne’e nia prosedura, tanba ne’e (problema) entre sosiedade sivíl ida  entre ita nia órgaun soberanu ida ne’ebé garante seguransa ba ita nia  sidadaun sira hotu hodi uza. Ita sei haree prosesu hotu, se maka merese atu hela iha ne’ebá,” hateten  Mário Ximenes ba jornalista, ohin, hafoin aprezenta problema rai ne’e ba Primeiru Ministru, Taur Matan Ruak iha Palásiu Governu, Dili.

Nia dehan, CPD-RDTL mós labele ezije katak, rai ne’e sira mak okupa no sira mak na’in ba rai ne’e la loos. Tanba rai ne’e estadu Timor-Leste nian.

Iha fatin hanesan, Komandante Jerál Polisia Nasionál Timor-Leste (PNTL), Faustino da Costa dehan, Komandu PNTL no Ministériu Interiór simu ona karta hosi UNIJMA, maibé entrega fali ba Ministériu Justisa maka sei haree estatutu rai ne’e tuir lei.

“Maluk sira hosi UNIJMA nia ejijénsia hosi parte Komandu Polisia entrega ona karta ne’e ba Ministru Justisa atu haree. Tanba iha 2014 polisia iha despaxu de konsesaun de uzu ba rai au-mézmu tempu atribuisaun ba PNTL,” nia esplika.

Nia dehan, parte PNTL mós aprezenta dokumentu kompletu hosi Ministériu Justisa bainhira entrega rai ne’e ba polisia hodi utiliza too agora.

Sekretáriu Jerál UNIJMA, Gil Fernandes da Costa deklara liuhosi karta komunikadu ne’ebé Ajénsia Tatoli asesu katak, (UNIJMA/eis CPD-RDTL) husu ba Governu no Komandu PNTL atu entrega hikas eis edifísiu CPD- RDTL iha área Balidi, Dili.

Gil Fernandes Costa husu atu edifísiu ne’e entrega hikas ba UNIJMA hodi uza hala’o sira nia atividade. Tanba fatin ne’e uluk UNAMET mak utiliza iha 1999 hodi hala’o servisu administrasaun ba prosesu restaurasaun independénsia. Nune’e, too tempu 1999, eis CPD-RDTL maka uza too ikus governu duni sai membru hodi fó fali fatin ne’e ba PNTL.

Gil hatutan, bazeia ba rezolusaun no.5/III.2014 polisia kriminaliza tiha eis CPD-RDTL hodi obriga membru eis CPD-RDTL atu abandona tiha fatin refere ne’ebé mak sira uza nu’udar sede ba organizasaun ne’e.

Rezolusaun ne’e hamosu prejuizu boot ba eis CPD-RDTL nia membru sira iha aspetu fíziku, materiál no mentál durante tinan neen (6) 2014-2019, no hetan ona absolvisaun totál hosi Tribunál Distritál Dili iha loron 23 setembru 2019.

UNIJMA ezije ba Ministru Defeza no Interiór atu hasai despaxu urjente ida hodi orienta PNTL atu entrega hikas sede sentrál eis CPD-RDTL/ UNIJMA iha Balidi. La’ós sede de’it, maibé mós objetu seluk ne’ebé PNTL prende iha 5 marsu 2014, atu lori hikas ba sede Balidi.

Portavós UNIJMA ezije ba governu atu tau iha prátika nia deklarasaun fó sai iha loron 24 Setembru 2019 katak PNTL prontu atu entrega hikas sede eis CPD-RDTL nian iha Baucau no Balidi ba eis CPD-RDTL rasik. Ho razaun tanba Tribunál Distritál Dili halo ona absolvisaun totál ba kazu sede CPD-RDTL.

Gil hatutan,  hafoin hetan ona absolvisaun hosi tribunál bazeia ba  artigu 173 ezije ba PNTL atu entrega fila fali objetu movel sira ne’ebé ulun sira hadau hosi CPD-RDTL. Tanba uluk PNTL uza artigu 172 hodi hanehan CPD-RDTL, agora oras to’o ona atu PNTL obedese lei 173 hodi entrega hikas objetu sira CPD nian.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here