Primeiru-Ministru, Taur Matan Ruak. Imajen TATOLI/ Egas Cristovao

DILI, 25 fevereiru 2020 (TATOLI) – Primeiru-Ministru (PM), Taur Matan Ruak, aprezenta ona karta demisaun ba Prezidente Repúblika (PR), Francisco Guterres Lú Olo.

“Ohin enkontru ida ne’ebé Prezidente Repúblika konvoka no ha’u ko’alia ho Prezidente Repúblika, ha’u hatama karta ida manifesta ha’u-nia intensaun ba demisaun. Ohin, ha’u ko’alia ho Prezidente maibé última palavra ba Prezidente ne’e maka tuir ita-nia konstituisaun. Demisaun ne’e válidu kuandu Prezidente dekreta ona, enkuantu seidauk iha, ha’u kontinua hanesan Primeiru-Ministru atu garante ita-nia atividade governativa iha ita-nia rain”, Taur deklara hafoin enkontru semanál ho PR Lú Olo, iha Palásiu Prezidensiál, Bairru-Pité, ohin.

Kona-ba durasaun tempu atu dekreta, PM Taur dehan, ne’e depende ba Prezidente Repúblika.

Hatan ba jornalista ne’ebé husu kona-ba bainhira Prezidente Repúblika la dekreta pedidu demisaun ne’e, Taur hateten, nia prontu atu serbisu nafatin.

“Serbisu nafatin. Siap! Ita mós labele husik ita-nia nasaun sem diresaun hanesan karreta ida karik, kondutór laiha,” PM hateten.

PM aprezenta karta demisaun ne’e tanba konsidera koligasaun foun iha ona no Primeiru-Ministru sei esplika situasaun ne’e ba povu.

“Ha’u hanoin ita-boot sira rona ona, koligasaun foun iha ona. Ha’u hanoin to’o tempu, ha’u sei esplika ba populasaun no ha’u hateten ba ita-boot sira katak demisaun ne’e válidu bainhira Prezidente dekreta. Kuandu seidauk dekreta, ha’u kontinua Primeiru Ministru”, nia subliña.

Antes ne’e, Prezidente Repúblika, Francisco Guterres, hateten Xefe Estadu hein karta demisaun husi Primeiru-Ministru, Taur Matan Ruak.

Notísia Relevante: PR Lú Olo: “Governu no Primeiru-Ministru Mantein Nafatin”

Jornalista : Cipriano Colo

Editór       : Cancio Ximenes

INFORMASAUN

HAKEREK NO HATÁN

Please enter your comment!
Please enter your name here