Prezidente Repúblika, Francisco Guterres Lú Olo. Imajen/TATOLI

DILI, 03 marsu 2020 (TATOLI)–Prezidente Repúblika (PR), Francisco Guterres “Lú Olo”, aproveita Komemorasaun Loron Nasionál Veteranu sira-nian, husu buat tolu ba Konsellu Kombatente Libertasaun Nasionál atu haree nu’udár prioridade atubele  tulun Estadu.

“Ha’u aproveita Loron Veteranu sira-nian, hodi husu tan buat tolu ba Konsellu Kombatente Libertasaun Nasionál atu haree. Primeiru, oinsá grava lalais istória husi kombatente idak-idak ne’ebé sei moris tanba ita lakon ona ema barak iha tempu ukun-an. Bainhira ida mate, ita lakon daudaun parte ida husi ita-nia istória koletiva. Segundu, ajuda eduka ita-nia ema atu respeita Konstituisaun RDTL no hametin valór no prinsípiu luta libertasaun nasionál nian. Terseiru, ajuda Governu atu dezenvolve lalais turizmu istóriku,” dehan PR Lú  Olo liuhusi ninia deskursu iha Komemorasaun Loron Nasionál  Veteranu sira-nian iha Praça de Proclamação da Independéncia, Palásiu Governu, Dili, ohin.

Xefe Estadu ne’e haktuir, Kombatente Libertasaun Nasionál husi Frente Tolu hala’o ona Kongresu Nasionál dahuluk iha Dezembru 2019, hodi eleje responsável sira hodi kaer órgaun sentrál-sira iha Conselho dos Combatentes da Libertação Nacionál (CCLN-sigla Portugés).

Ida-ne’e, Xefe Estadu ne’e hatutan, pasu boot ida en-termu organiza-an iha nível nasionál liuhusi entidade ida hanaran CCLN. Liuhusi CCLN ne’e mak sei ajuda Estadu atu valoriza di’ak liután eis-kombatente sira, liuhusi polítika ida-ne’ebé tau-matan ba sira maibé haburas mós espíritu moris ho kbiit rasik.

“Iha Kongresu dahuluk ne’e, ha’u fó hatene katak ha’u fó apoiu tomak ba Governu nia inisiativa atu hamosu Fundu Veteranu ida, nu’udár fonte finansiamentu koletivu ida atu hatán ba nesesidade kombatente sira-nian ohin loron,” nia hateten.

Nia halaken, ida-ne’e mós sei haree oinsá tulun sira-nia oan no beioan sira. Tanba, nia dehan, Ministru Interinu no Sekretáriu Estadu ba Asuntu Kombatente Libertasaun, Gil da Costa Monteiro ‘Oan Soru’ halo daudaun ona esforsu atu harii fundu ida-ne’e ho baze legál.

“Ne’e katak tenke iha dekretu-lei ne’ebé define polítika ba fundu ida-ne’e. Katak, oinsá jere, sé mak jere, rai iha ne’ebé, kobra oinsá no hira husi kontribuinte idak-idak. Oinsá Fundu hetan funan, oinsá hato’o benefísiu no uza ba saida no oinsá oan no bei-oan sira hetan benefísiu,” Xefe Estadu subliña.

Notísia Relevante: Xefe Estadu Fó Rekoñesimentu Espesiál Ba Xanana, Horta no Alkatiri

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here