Prezidente Repúblika, Francisco Guterres Lú Olo. Imajen Tatoli/António Gonçalves

DILI, 03 marsu 2020 (TATOLI)–Xefe Estadu, Francisco Guterres “Lú Olo”, fó rekoñesimentu espesiál ba fundadór movimentu Ukun Rasik-Aan no Unidade Nasionál ne’ebé sei moris hela mak lider prinsipál no reorganizasaun luta libertasaun nasionál iha 1981, Komandante FALINTIL, Kay Rala Xanana Gusmão no mós Marí Alkatiri no José Manuel Ramos Horta.

“Iha loron-ohin, ha’u hakarak fó rekoñesimentu espesiál ida ba fundadór movimentu Ukun Rasik-An no Unidade Nasionál, ne’ebé sei moris hela mak líder prinsipál no reorganizasaun luta libertasaun nasionál, iha 1981, Komandante FALINTIL, Xanana Gusmão, Marí Alkatiri no Ramos Horta,” Xefe Estadu hato’o rekoñesimentu espesiál ne’e liuhusi diskursu Komemorasaun Loron Nasionál Veteranu sira-nian ba datoluk iha Praça de Proclamação Independéncia, Palásiu Governu, Dili, ohin.

Xefe Estadu hateten, ohin, iha fatin istóriku ida-ne’e, nia husu ba hotu-hotu hakruuk ba memória hotu-hotu nian, feto no mane.  Tanba lista rohan-laek, Xefe Estadu temi de’it naran balun hanesan Prezidente Nicolau Lobato, Rosa Muki, Borja da Costa, Maria Tapó, Vicente Sahe, Soimali, Maria Goretti Joaquim, Hodu Ran Kadalak, Sabalae, David Alex no Nino Konis Santana.

PR Lú Olo mós lori povu no Estadu Timor-Leste nia naran, hato’o hako’ak boot ba família hotu-hotu ne’ebé lakon maluk iha luta libertasaun nasionál.

Ho Estadu Timor-Leste nia naran, Xefe Estadu hato’o mós rekoñesimentu boot ba Kombatente Libertasaun Nasionál, feto no mane, koñesidu no dezkoñesidu, ne’ebé kontribui liuhusi hahalok kii’k ka boot, iha Frente Armada, Klandestina no Esterna ka Diplomátika.

Nia hato’o mós agradesimentu ba solidariedade internasionál ne’ebé timoroan hotu simu husi Portugál no husi Moçambique, Angola no eis-kolónia portugeza sira seluk, iha Áfrika, husi Governu balun, partidu polítiku, organizasaun naun-governamentál no sidadaun sira iha mundu tomak.

“Ho hotu-hotu nia kontribuisaun mak ita manán Ukun Rasik-An. Hamutuk ita sei luta nafatin ba futuru di’ak ba ita-nia oan no bei-oan sira, iha ita-nia Timor-Leste livre no independente,” nia dehan.

Partisipa iha sermónia komemorasaun ne’e, Prezidente Parlamentu Nasionál, Arão Noé de Jesus da Costa Amaral, Primeiru-Ministru, Taur Matan Ruak, Prezidente Tribunaál Rekursu, Deolindo dos Santos, Eis-Titulár sira, Deputadu sira no membru VIII Governu Konstitusionál.

Aleinde ne’e, marka prezensa mós iha serimónia ne’e mak Xefe-Estadu Maiór Jenerál FALINTIL-FDTL, Komandante Jerál PNTL, Membru Korpu Diplomátiku, Kombatente Libertasaun Nasionál husi Frente Armada, Frente Klandestina no Frente Diplomátika ka esterna, mamília mártir no kombatente sira-nian iha Timor-Leste tomak, Reprezentante Konfisaun Relijioza, reprezentante sira hosi organizasaun sosiedade sivíl no povu Timor-Leste.

Jornalista : Cipriano Colo

Editór      : Cancio Ximenes

1 KOMENTÁRIU

  1. Parabens rohan laek ba Nai Presidenti RDTL nb dirige cerimonia spesial loron Veteranus 3-3-1981/3-3-2020 ba da3 iha Prasa Dili no kongratula ms ba Nai Presidenti nb ms hatoo rekonhecimento spesial ba fundadores Movimento Ukun Rasik an no Unidade Nasional nain 3 mak hanesan, DR. Mari Alkatiri, DR. Jose Ramos Horta nms maun bot Kai Rala Xanana Gusmao, abra¢os

HAKEREK NO HATÁN

Please enter your comment!
Please enter your name here