Konselleru Másimu Partidu Kmanek Haburas Unidade Nasionál Timoroan (KHUNTO), José dos Santos Naimori Bucar. Imajen Tatoli/Eugénio Pereira.

DILI, 03 marsu 2020 (TATOLI)—Konselleiru Másimu Partidu Kmanek Haburas Unidade Nasionál Timor Oan (KHUNTO), José dos Santos Bucar “Naimori” hateten, KHUNTO prontu iha kualkér situasaun inklui Eleisaun Antesipada (EA).

Maibé, nia hatutan, desizaun saida de’it mak Prezidente Repúblika foti, KHUNTO prontu atu simu.

“Desizaun ne’e iha Prezidente Repúblika nia liman. Se Prezidente dehan di’ak liu mak ba ida atu forma Governu ne’e ita simu. Se Prezidente dehan katak lae, duké imi sobu malu di’ak liu ba Eleisaun Antesipada, KHUNTO ne’e prontu de’it bainhira mak bá Eleisaun Antesipada no KHUNTO prontu bainhira mak forma Governu. Ita prontu sai servidór,” Naimori informa ba jornalista sira iha Manleuana, Dili, tersa ne’e.

Nia dehan, lideransa hosi KHUNTO ne’e prontu hamutuk ho lideransa partidu sira seluk halo buat foun ba nasaun no povu rai ida-ne’e.

Naimori afirma, haree ba situasaun polítika atuál KHUNTO asegura estabilidade, pás ka dame.

“Ida-ne’e mak ita-nia esperansa. Agora ita fó ba Nai Prezidente Repúblika, tanba nia mak foti desizaun ikus liu. Nia sei foti desizaun tuir Konstituisaun RDTL artigu 86 atubele solusiona inserteza polítku iha rai-laran,” nia dehan.

Lideransa Másimu KHUNTO ne’e subliña, kestaun negosiasaun kona-ba estrutura Governu la importante, maibé importante mak rezolve problema.

“Negosiasaun ne’e ikus, oinsá mak impase polítika ne’e bele ramata. Ida-ne’e mak ita tenke halo. Primeiru, ita tenke haree ba sentidu Estadu. Kestaun sira seluk, depois mak ita sei ko’alia,” nia hateten.

Konselleiru Másimu ne’e afirma, solusaun di’akliu mak inserteza polítika ne’e tenke hakotu no tenke lori governasaun ida to’o iha rohan, la’ós ba kotuk hela de’it.

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here