DILI, 2 marsu 2020 (TATOLI)—Colégio Infante de Sagres Maliana forma ona ekipa “Ad Hoc” ne’ebé lidera hosi Diretór Jerál Colégio Infante de Sagres no Prezidente Fundasaun Sagrado Coração de Jesus Maliana, Pe. Norberto Soares, ohin, hahú hala’o knaar prinsipál atubele halo jestaun ba dezastre ahi han Lar Femeninu, foin lalais ne’e.

Diretór Jerál Colégio Maliana Pe. Norberto Soares liuhosi telefone informa, membru hosi ekipa “Ad Hoc” ne’e mak ekipa formadora Lugululi kompostu husi Kleru sira hotu ne’ebé serbisu iha Colégio Maliana, semináriu menór, Ensinu Sekundáriu, Ensinu Báziku, Internatu Maskulinu, seminarista finalista ka pró Diákonu.

Aleinde ne’e, Amu hateten, madre sira ne’ebé serbisu iha Internatu Femeninu, profesór no staff hotu ne’ebé serbí iha Eskola Sekundáriu Jerál, Ensinu Báziku Sentrál Colégio Maliana no staff Internatu Femeninu, Dirijente no staff Fundasaun Sagrado Coração de Jesús nian no voluntáriu sira hotu hala’o knaar importante ne’e.

“Knaar prinsipál hosi Ekipa “Ad Hoc” ida-ne’e atubele halo jestaun ba dezastre refere. Hamatan hosi loron ba loron, estudantes sira hotu iha Betania Training Center. Hamatan ba sira-nia nesesidade hotu, halo programa no oráriu loron-loron nian,” dehan Pe. Norberto liuhosi telefone, ohin.

Nia hatutan, ekipa refere ninia knaar ida tan mak simu no organiza hodi distribui apoiu sira hotu ba vítima sira. Prepara kondisaun atu estudante sira bele filafali ba eskola, prepara dormitóriu emerjénsia, prepara buat hotu atu lar bele funsiona, no bele koordena ho ema hotu ne’ebé hakarak atu tulun hodi ultrapasa situasaun ida-ne’e.

Nia informa, to’o oras ne’e daudaun menina asrama sira hotu ho kondisaun di’ak hela no to’o oras ne’e sira hela nafatin iha Betania Training Center Maliana.

“Sira partisipa hotu iha atividade ne’ebé ekipa sira organiza. Inan-aman sira mós barak mak mai vizita sira no fó konsolasaun. Amu bispu Dioseze Maliana halo ona enkontru hodi fó konsolasaun ba sira iha loron sesta, 28 Fevereiru 2020,” nia dehan.

Estudante nia inan-aman sira, nia hatutan, mai halo ona vizita ba oan sira no lori oan sira balun ba merkadu hodi kompra buat ruma ba sira-nia nesesidade. To’o oras ne’e daudaun, estudante sira hotu di’ak hela no laiha ema ida mak hetan moras.

Pe. Norberto mós relata, materiál sira ne’ebé ahi han hodi halo Colégio Infante de Sagres Maliana lakon Uma ida ho medida metru 40×12 ho nia valór $72,000.00.

Nia informa, fasilidades iha uma laran hanesan kama, armáriu, esponza sura ba osan hamutuk $15,640.00, sasán estudantes sira-nian hanesan roupa, farda, sapatu, no seluk tan ne’ebé baku ba osan hamutuk $16,100.00.

Nia haktuir, estudante sira-nia osan cash $3,677.50, motorizada ida $750.00, Laptop Macbook 500.00 ho totál osan hamutuk $108,667.50.

Aleinde ne’e, nia hatutan, estudante hirak-ne’e mós lakon sira-nia dokumentu importante sira hanesan pasaporte, kartaun eleitorál, Billete Identidade (BI), diploma, kaderneta, sertifikadu no seluk tan.

“Estudante sira mós lakon dokumentu sira hanesan Pasaporte, BI, Kartaun Eleitorál, Diploma no Kaderneta, sertifikadu, livru konta bankária, Kartaun ATM nian. Maibé, entidade relevante sira hanesan Administrasaun Munisípiu Bobonaro hato’o ona disponibilidade atubele ajuda halo rekomendasaun bainhira atu trata filafali dokumentu sira-ne’e, bainhira presiza,” nia esplika tan.

Notísia Relevante:  Ahi Han Lar Femeninu Colégio Maliana Sei Inserteza

Jornalista : Cipriano Colo

Editór        : Cancio Ximenes

HAKEREK NO HATÁN

Please enter your comment!
Please enter your name here