DILI, 28 fevereiru 2020 (TATOLI)–Diretór Jerál Colegio Infante de Sagres Maliana, Pe. Norberto Soares informa, to’o oras ne’e seidauk iha serteza kona-ba kauza ne’ebé hamosu ahí han Lar Femeninu Colégio Infante de Sagres Maliana, kinta (27 fevereiru 2020) iha tuku 21.35 kalan ne’e.

Nia hateten, maske seidauk iha serteza loloos maibé iha ipóteza tolu (3) ne’ebé deskonfia hamosu ahí han uma ne’e mak hanesan, primeiru sirkuitu eletrisidade; segundu, husi lilin sira ne’ebé estudante sira sunu atu reza; no terseiru ema mak sunu (crime), no ida ne’e parte Colégio husik ba autoridade kompetente mak identifika.

“Ahi han Lar Femeninu ka Asrama feto nian, komesa han iha tuku 21.35. Ahi hahú han iha parte odamatan boot klaran. Lar ne’e iha dormitóriu haat, tolu ba estudante Ensinu Sekundária no ida ba profesor sira no staf internatu nian. Ahi han lalais loos tanba sasáan sira ne’ebé iha laran mesak sasan sira ne’ebé fásil atu ahi han. Sasán sira ne’e mak hanesan roupa, armáriu, kama, kulsaun ou esponza, plafón ne’ebé halo hosi tripleks. Ahi han la to’o minutu sanulu, internatu ne’e kuaze atu hotu kedan. Bombeiru sira mós labele halo buat barak tanba ahi han lais liu”, Padre Norberto esplika liu husi komunikadu, ohin.

Diretór jerál ne’e esplika, estudante ka larista sira ne’ebé hela iha lar Colégio Infante de Sagres Maliana hamutuk ema na’in 117. Sira ne’ebé afetadu materialmente no psikolójikamente iha estudate hamutuk ema na’in 92.

Kona-ba Sira seluk, Padre hateten, afetadu psikolojikamente de’it tanba dormotóriu ne’ebé sira hela ba separa ho dormitóriu ne’ebé ahi han.

“Iha momentu akontesimentu, estudante sira maioria iha hotu liur hela. Sira sei estuda hela. Tanba ne’e, fasil atu hasees aan. Estudante na’in tolu de’it mak iha dormitóriu laran, no ho tulun Maromak nian sira mós bele sai hosi lar. Laiha estudante ida mak sai vítima direta ba inséndiu ne’e. Iha estudante na’in haat mak trauma no konsegue lori sira ba ospitál Maliana. To’o agora sira hotu di’ak ona. Agora daudaun, Diocese Maliana evakua hotu larista sira ne’e ba hela iha Betania Training Center (Camara Antigu Dioseze Maliana) no Ekipa formadora hamatan hela ba sira nia nesesidade bázika hotu,” Amo Norberto esplika.

Lar ne’e ho nia medida 40 vezes 12 metru, kompostu husi Kama andar kuaze 50 no armário 50, ahi han mohu, inklui estudante sira-nia roupa, kadernu ho dokumentu importante sira seluk.

Notísia Relevante: Vítima Na’in Haat Trauma, Evakua Ba Hospitál Referénsia Maliana

Jornalista : Cipriano Colo

Editór     : Cancio Ximenes

HAKEREK NO HATÁN

Please enter your comment!
Please enter your name here