Diretór Ezekutivu Pelican Paradise, Jeremiah Chan. Imajen/Florencio Miranda Ximenes.

DILI, 28 fevereiru 2020 (TATOLI) – Diretór Ezekutivu Pelican Paradise, Jeremiah Chan, informa ohin loron hahú lansa ofisiál investimentu ba konstrusaun apartementu, otél no rezidénsia hamutuk unidade 287 ho kustu orsamentu millaun $100 iha área Tasi-Tolu.

“Ami ba hasoru Primeiru-Ministru, Taur Matan Ruak ne’ebé husu ami labele hein, ne’ebé iha parte ne’e ami mós hakarak komesa ho faze dahuluk hodi konstrui apartementu, otél, inklui rezidénsia hamutuk unidade 287 ho nível otél fitun-lima”, tenik Dirijente ne’e iha Tasi-Tolu, sesta ne’e.

Nia realsa, faze dahuluk ba projetu ne’e tanba haree rai ne’e livre, empreza halo konstrusaun ona hodi hein Governu rezolve okupamente iha área Tasi-Tolu, hafoin empreza kontinua projetu faze daruak nian.

Notísia Relevante: Projetu Pelican Paradise, PM Husu Empreza Labele Hein Komunidade Mamuk

PM Taur Husu Kompañia Pelican Paradise, Bainhira Hahú Projetu?

“Ami nia planu otél boot fitun-lima ne’e iha Tasi-Tolu, maibé agora okupante sei iha ne’ebá. Sé karik ami hein de’it Governu rezolve okupante sira ne’e, to’o tinan hira mak ami bele komesa investimentu ne’e”, nia akresenta.

Nune’e, nia refere liután ba investimentu dahuluk ne’e empreza presiza traballadór timoroan na’in-300, tanba projetu faze dahuluk ne’e ho estimasaun sei finaliza durante tinan tolu nia-laran.

Jeremiah Chan adianta, projetu ne’e resposabiliza husi Pelican Paradise, ne’ebé sei halo obra iha rai ektare 16.

Konstrusaun ne’e sei finaliza projetu investimentu  faze dahuluk iha 2024.

Antes ne’e, Ministru Estadu Prezidénsia Konsellu Ministru, Hermenegildo Augusto Cabral Pereira, hateten ezekutivu sira rona aprezentasaun kona-ba projetu Pelican Paradise, hanesan projetu boot ida-ne’ebé dezenvolve kle’ur ona to’o ohin loron, nune’e bele entende didi’ak to’o ona pontu ne’ebé no atu hahú oinsá.

“Laiha aprovasaun finál kona-ba akordu maibé iha apoiu polítiku totál, hahú hosi Primeiru-Ministru no Konsellu Ministru (KM) tomak ba projetu ne’e atu la’o ba oin, hodi bele kria empregu ba ita-nia rain no projeta konfiansa ba investimentu estranjeiru ne’ebé ita presiza”, tenik Ministru iha Palásiu Governu, foin lalais.

Tuir governante ne’e, Primeiru-Ministru ho membru governu seluk hakarak serbisu maka’as ba viabilizasaun, nune’e bele tulun hamosu duni projetu ne’e hanesan realidade ba rai Timór.

Tuir planu, Pelican Paradise sei halo dezenvolvimentu turístiku ho investimentu hamutuk ho montante miliaun $700.

Área dezenvolvimentu turístiku ne’e tuir planu sei harii iha rai ektare 558, iha zona entre Tasi-Tolu no Tibar, ne’ebé sei inklui unidade otelaria, kampu golf, lote rezidensiál, sentru dezenvolvimentu ba joven sira, eskola internasionál ida, ospitál ida no sentru komersiál.

Dezenvolvimentu ne’e sei permite kriasaun kampu traballu ba ema 1500 iha faze konstrusaun no 1300 kampu traballu permanente hafoin konstrusaun no reflorestasaun projetu atinje ona porsentu 80.

Proposta Investimentu Hahú Tinan 2008

Proposta investimentu kompañia internasionál husi Malázia ne’e hahú kedas iha tinan-2008, iha V Governu Konstitusionál ninia tempu, ne’ebé antes ne’e lidera husi Primeiru-Ministru, Kay Rala Xanana Gusmão.

Nune’e, Governu hasai rezolusaun númeru 33/2015, 5 outubru no aprova hodi hahú konstrusaun.

Kontratu Pelican Paradise ho Governu iha inisiál ba tinan 50 no posibilidade sei renova ba tinan 50.

Nune’e mós, Pelican Paradise sei sai mother company ba kompañia hamutuk 20 husi nasaun Singapura no Malázia, ne’ebé sei hamutuk halo projetu boot ne’e.

Hetan Ona Sertifikadu Investimentu Husi Governu

Antes ne’e, iha loron 22 janeiru 2018, VII Governu Konstitusionál atribui ona sertifikadu investimentu ba Pelican Paradise hodi halo investimentu turístiku.

Hafoin atribui sertifikadu investimentu husi Tradelnvest tuir planu konstrusaun ne’e sei hahú iha loron 31 marsu 2018 husi faze hanesan sei harii otél no halo konkursu internasionál.

Sertifikadu ne’e entrega direta husi Xefe Governu VII, Marí Alkatiri ba CEO Pelican Paradise, Datuk Edwar Ong, akompaña husi membru governu balun no emprezáriu nasionál no internasionál, no mós parseiru dezenvolvimentu sira.

Iha aprezentasaun, ekipa husi Pelican Paradise fó atensaun maka’as ba ambiente, nune’e sei kuda ai-horis iha foho lolon no fatin ne’ebé mak ai-horis laiha, nu’udar parte ida husi re-florestasaun, tanba ne’s Governu mós apresia inisiativa ne’e.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here