Primeiru-Ministru, Taur Matan Ruak, Imajen Egas Cristovão

DILI, 18 jullu 2019 (TATOLI)—Primeiru-Ministru (PM) Taur Matan Ruak husu ba kompañia Pelican Paradise, bainhira mak atu hahu instalasaun ba projetu iha Timor.

Xefe Governu ne’e husu tanba, dezde hanesan Jenerál nia rona ona kona-ba kompañia refere, bainhira sai hanesan Prezidente Republika mós, rona ona naran kompañia ne’e no to’o ohin loron hanesan Primeiru-Ministru ho mandatu besik ramata ona, maibé seidauk haree kompañia ne’e atu investe iha Timor.

“Ha’u rona kompañia ida ne’e dezde ha’u sei Jenerál, ikus mai hanesan Prezidente Repúblika mós rona nafatin no oras ne’e hanesan Primeiru-Ministru ho mandatu besik ramata ona, kompañia ne’e seidauk halo buat ida. Tanba ne’e, ha’u husu ba Kompañia, bainhira loos mak atu halo projetu ne’e iha Timor,” kestiona Taur hodi responde pergunta jornalista nian, hafoin hasoru malu ho Prezidente Repúblika, Francisco Guterres Lú Olo iha Palásiu Prezidente Nicolau Lobato, Bairru Pite, Dili, ohin.

Entretantu, iha loron 19 fulan outubru 2018, Diretór Grupu Pelican Paradise, Datuk Edward Ong, akompaña hosi Diretór Ezekutivu TradeInvest Timor-Leste, Arcanjo da Silva hasoru malu ona ho Prezidente Repúblika, Francisco Guterres Lú Olo,  iha iha Palásiu Prezidente Nicolau Lobato Bairo Pite, Dili.

Iha enkontru ne’e, Datuk Edward Ong relata ba Xefe Estadu kona-ba prosesu investimentu ne’ebé Grupu Pelican Paradise sei halo iha area Tasi Tolu, ne’ebé tuir planu, sei okupa rai hektare 554.

Investimentu ho totál osan Dolares Amerikanu 700.000.000 ne’ebé nia prosesu hahú kedas iha tinan 2008 ne’e, sei harii iha Tasi Tolu, Otél fitun-lima ida, Sentru Komersiál ida, Kampu Golf, Eskola no Ospitál ho Padraun Internasionál, Sentru Dezenvolvimentu Juventude inklui reflorestasaun ba foho-lolon hektare 350 iha Tasi Tolu.

Tuir Datuk Edward Ong, atu hahú implementa projetu ida ne’e sira presiza halo akordu espesiál investimentu ho Governu Timor-Leste hodi haree pontu lubuk ida, liliu relasiona ho lei, aspetu sósiu-ekonómiku, ambientál no oinsá atu hasai ema hamutuk 1.800 resin ne’ebé oras ne’e okupa hela área ne’ebé sei implementa projetu refere.

Iha faze konstrusaun projetu ne’e, sei prezisa traballadór hamutuk ema 1.500 no sei emprega progresivamente ema iha kada tinan.

Antes ne’e mós, Diretór TradeInvest Timor-Leste, Arcanjo da Silva hateten, ezbosu akordu espesiál Investimentu entre Grupu Pelican Paradise ho Governu kompleta ona.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here