Ministra Edukasaun, Juventude no Desportu Dulce de Jesus Soares. Imajen/António Gonçalves.

DILI, 28 fereveiru 2020 (TATOLI) – Ministra Edukasaun, Juventude no Desportu, Dulce de Jesus Soares, hateten hafoin simu informasaun hosi Padre Pároku Maliana, Norberto Soares, nia parte halo koordenasaun ho ministériu relevante hanesan Ministériu Solidariedade Sosiál no Inkluzaun (MSSI) no Sekretaria Estadu Protesaun Sivíl (SEPS), hodi ajuda estudante sira.

Ministra hato’o lia hirak ne’e relasiona ho akontesimentu iha kinta (27/02) tuku 21:35, ne’ebé ahi-han Lar Feminino Colégio Infante de Sanges Maliana, hodi rezulta estudante balun sai vítima.

“Ha’u simu ona informasaun horikalan no dadeer ohin, ha’u telefone ba Padre Pároku ne’ebé maka tau-matan ba eskola ne’e no iha estudante hamutuk na’in-117 maka sai vítima. Ha’u hatún ona ekipa ida husi Inspesaun Jerál no mós Diretora Jéral Administrasaun Finansa. Oras ne’e sira iha ona Maliana no ha’u espera katak bele hetan informasaun”, tenik Ministra Dulce iha Palásiu Governu, sesta ne’e.

Nia realsa, parte Ministériu Edukasaun, Juventude no Desportu (MEJD) halo koordenasaun ho ministériu relevante sira hodi haree apoiu saida mak bele fornese ba vítima sida ne’ebé maioria estudante.

Notisia relevante: Ahi Han Lar Femeninu Colégio Maliana Sei Inserteza

Governante ne’e dehan, parte MEJD sei ajuda materiál eskola no sasan seluk.

“Bainhira ha’u simu informasaun hosi Padre, ami (MEJD) hatene katak buat ne’ebé ami ajuda maka livru, kadernu, no materiál eskola nian, tanba ida-ne’e hanesan ami ninia responsabilidade, maibé tanba estudante sira ne’e mai hosi munisípiu sira seluk mak presiza apoia urjente, nune’e prosesu aprendizajen bele la’o ho normál”, nia akresenta.

Kauza hosi inséndiu ne’e rezulta kama andar kuaze 50 no armáriu 50 mak ahi-han mutuk, hamutuk ho estudante sira nia roupa no sasan sira seluk iha Colégio, inklui mós kadernu no dokumentu sira.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here