Primeiru-Ministru, Taur Matan Ruak, Prezide Reuniaun Konsellu Ministru Extraordinario, Iha Palásiu Governu, Dili, Sexta (28/02/2020). Imajen/Tatoli Egas Cristovao

DILI, 28 fevereiru 2020 (TATOLI) – Governu liuhosi reuniaun Konsellu Ministru (KM) estraordináriu iha sesta lorokraik ne’e, deside empreza MATO Unipessoal, Lda, ne’ebé halo Konsórsiu ho NIKMAT Mujur SDN hosi Malázia hodi fornese konbustível ba Sentrál Elétrika Hera iha Lote 1, hamutuk ho Empreza Esperansa Timoroan (ETO).

Nune’e, Proposta deliberasaun ne’ebé aprezenta hosi Ministru Obra Públika, Salvador Soares dos Reis Pires, hetan aprovasaun hosi ezekutivu sira.

“Ohin Konsellu Ministru delibera atu halo kontratasaun relasaun ho fornesementu mina ba Sentrál Elétrika Hera iha Lote 1. Kompañia MATO maka sei fornese kombustível”, informa Ministru Reforma Lejislativa Asuntu Parlamentár, Fidelis Manuel Leite Magalhães liuhosi konferénsia imprensa iha Palásiu Governu.

Notísia Relevante: CNA Aprezenta Kompañia Tolu Atu Fornese Kombustível ba Sentrál Eletríka

Governante ne’e realsa, aprovasaun diploma ne’e hodi garante fornesementu konbustível ba funsionamentu sentrál elétrika, ne’ebé prodús enerjia elétrika hodi distribui ba territóriu tomak, la inklui Rejiaun Administrativa Espesial Oé-Cusse Ambeno (RAEOA) no Atauro.

Antes ne’e, kompañia ne’ebé fornese mina iha Sentrál Elétrika Hera mak ETO maibé ninia kontratu ramata ona iha loron 30 setembru 2019.

Kompañia ETO hahú kontratu foun ho Governu hodi fornese mina iha Sentrál Elétrika Hera Lote 1, hafoin desizaun ezekutivu iha 25 abríl 2017 ba tinan ida hafoin iha estensaun to’o agora.

Ho nune’e, Kompañia MATO no ETO mak daudaun ne’e fornese Komubustível iha Sentrál Elétrika Hera.

Reuniaun ezekutivu antes ne’e, aprova ona konkursu públiku fornesimentu kombustível ba sentrál elétrika tanba iha kompañia ida maka retira hafoin pasa ona konkursu.

Nune’e, KM aprova Proposta Deliberasaun reabertura konkursu públiku ba fornesimentu kombustível ba Sentrál Elétrika Hera ba tinan 2019 no 2020.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here