Primeiru-Ministru, Taur Matan Ruak, prezide Reuniaun Konsellu Ministru iha Palásiu Governu, Dili, Kuarta (25/09/2019). Imajen/TATOLI.

DILI, 25 setembru 2019 (TATOLI) – Ministru Obra Públika, Salvador Soares dos Reis Pires no Komisaun Nasionál Aprovizionamentu (CNA-sigla portugés) aprezenta proposta deliberasaun ida ba Konsellu Ministru, hodi fornese kombustível ba Eletricidade de Timor-Leste (EDTL) iha sentrál elétrika Hera no Betano durante tinan ida nia laran.

Ministru Estadu Prezidénsia Konsellu Ministru, Hermenegildo Augusto Cabral Pereira, hateten aprezentasaun ne’e hodi ezekutivu sira bele rona detalla prosesu aprovizionamentu ba lote tolu iha sentrál elétrika Hera no Betano.

“Haree detalla tanbasá mak kompañia balun eliminadu no balun avansa, nune’e rekomenda fali kompañia tolu ba Konsellu Ministru no Konsellu Ministru aprova rekomendasaun ne’e hodi prosesu aprovizionamentu bele kontinua la’o ba oin”, nia dehan iha Palásiu Governu, kuarta ne’e.

Notísia Relevante: Governu Deside Hanaruk Kontratu Ba Kompañia ETO-SAKOM

Maski proposta deliberasaun ne’e aprovadu ona maibé governante ne’e seidauk fó sai naran kompañia tolu ne’ebé sei fornese kombustível ba sentrál elétrika.

“Tanba iha faze konfidensialidade ha’u labele hato’o detalla ba  ita-boot sira”, nia dehan tan.

Antes ne’e, iha loron 15 janeiru 2019 liuhosi desizaun Konsellu Ministru aprova estensaun kontratu ba kompañia Esperansa Timoroan (ETO) hodi fornese kombustível ba sentrál elétrika Hera no kompañia SACOM ba sentrál elétrika Betano, ne’ebé kontratu sei ramata iha loron 30 setembru 2019.

Tuir kontratu Governu ho kompañia, fornesimentu kombustível vigór iha loron 22 juñu 2017 no termina iha marsu 2019, tanba ne’e Governu desidi estende to’o setembru 2019.

Kalkulasaun hosi EDTL, empreza lokál rua ne’e sei fornese mina litru milliaun 65 to’o setembru 2019.

Kompañia rua ne’e hahú kontratu foun ho Governu hafoin desizaun ezekutivu iha 25 abríl 2017 ba tinan ida hafoin iha estensaun to’o ohin loron.

Antes Governu hola desizaun, aprova ona prosedimentu konkursu públiku ba fornesimentu kombustível ba sentrál elétrika Hera no Betano, atu hatán tipu aprovizionamentu oinsá mak liga ho prosesu legál no liu vistu préviu husi Kámara Kontas (CdC-sigla portugés).

Aprovasaun prosedimentu ba tinan ne’e hahú iha fulan outubru 2019 to’o setembru 2020.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here