Primeiru-Ministru, Taur Matan Ruak. Imajen Tatoli/António Gonçalves

DILI, 28 fevereiru 2020 (TATOLI)–Primeiru-Ministru (PM), Taur Matan Ruak hasoru-malu ona ho autoridade Sekretariadu Tékniku Administrasaun Eleitorál (STAE), hodi hatene kona-ba kondisaun serbisu.

Taur Matan Ruak hateten, objetivu husi hasoru-malu ne’e, atu hatene mós kona-ba preparasaun, karik mosu duni Eleisaun Antesipada (EA).

“Loos. Ha’u husu atu hasoru sira, atu hatene sira-nia preparativu. Tanba, ita-boot sira hatene, iha loron 10 fevereiru kuandu Prezidente Repúblika ko’alia ho imi jornalista sira, Prezidente Repúblika hateten katak Eleisaun Antesipada ne’e hanesan últimu rekursu. Últimu rekursu ne’e katak la taka dalan. Entaun, ha’u hanesan Primeiru-Ministru, ha’u tenke hatene kondisaun sira, karik akontese duni EA. Maibé, sei la akontese di’ak liu. Tanba, ema hotu-hotu baruk ona atu ba eleisaun,” PM Taur hato’o asuntu ne’e, hafoin hala’o enkontru semanál ho Prezidente Repúblika, Francisco Guterres “Lú Olo”, iha Palásiu Prezidente Nicolau Lobato, Bairru-Pité, Dili, ohin.

Entretantu, PM Taur Matan Ruak hasoru-malu ho Diretór Jerál STAE, Edgar Sequeira Martins iha Palásiu Governu, Dili, iha 25 fevereiru 2020.

Hafoin enkontru, Edgar afirma, STAE sempre preparadu bainhira akontese Eleisaun Antesipada.

Notisia Relevante: STAE Atualiza Serbisu Ba Primeiru-Ministru

Jornalista : Cipriano Colo

Editór       : Cancio Ximenes

HAKEREK NO HATÁN

Please enter your comment!
Please enter your name here