DILI, 28 fevereiru 2020 (TATOLI)–Diretór Jerál Colégio Infante de Sagres Maliana, Pe. Norberto Soares informa, hafoin ahí han lar Femeninu Colégio Infante de Sagres Maliana, iha Kinta 27 fevereiru tuku 21.35 (kalan), rezulta estudante na’in haat sai vítima hodi evakua ba Ospitál Referénsia Maliana tanba trauma.

“Iha estudante na’in haat mak trauma no konsegue lori sira ba ospitál referénsia Maliana. To’o agora sira hotu di’ak ona. Agora daudaun, Dioseze Maliana evakua hotu larista sira ne’e ba hela iha Betania Training Center iha Kâmara Antigu Dioseze Maliana no Ekipa formadora hamatan hela ba sira nia nesesidade bázika,” dehan Diretór Jerál Colégio Infante de Sagres Maliana, Pe. Norberto Soares, ba Ajénsia TATOLI liuhosi telefone, ohin.

Nia hateten, oras ne’e daudaun, ekipa formadora Colégio Infante de Sagres Maliana serbisu hela atu bele hasoru situasaun ida ne’e no estudante sira presiza liuliu mak sasan ijiene feto nian iha momentu ida ne’e.

Alende ne’e, Padre ne’e hatutan, ekipa mós serbisu hela atu bele halo estudante sira bele pasa iha momentu traumátiku ida ne’e.

“Estudante sira sei hela iha Training Center Kâmara Antigu Dioseze Maliana, to’o tempu ne’ebé sei determina iha tempu tuir mai,” nia salienta.

Oras ne’e daudaun, ekipa formadora suspende hela prosesu aprendizazen, no sei normaliza hikas iha tempu badak nia laran.

“Prosessu aprendizazen iha Colégio Maliana sei suspende hotu to’o tempu ne’ebé sei determina tuir mai. Ekipa formadora sei buka meiu hotu atu prosesu aprendizazen bele la’o hikas iha tempu badak nia laran,” nia subliña tan.

Ikus liu, diretór jerál ne’e husu ba parte hotu, liu liu ba inan- aman sira atu labele pániku tanba Dioseze Maliana sei buka meiu hotu atu bele ultrapassa situasaun ida ne’e.

“Obrigadu ba solidariedade ne’ebé Colegio Maliana simu husi ema hotu. Maromak sei rekompensa,” nia dehan.

Jornalista : Cipriano Colo

Editór       : Cancio Ximenes

HAKEREK NO HATÁN

Please enter your comment!
Please enter your name here