Vise-Prezidente Parlamentu Nasionál, Maria Angelina Sarmento. Foto Egas Cristóvão

DILI, 27 fevereiru 2020 (TATOLI)—Terseiru Vise-Prezidente Partidu Libertasaun Populár (PLP), Maria Angelina Sarmento Lopez, espera Partidu Congresso Nacional de Reconstrução de Timor (CNRT) ne’ebé lidera koligasaun foun ne’e bele solusiona impase polítika ho imediatamente.

Nia hatutan, PLP sei la impede koligasaun foun ne’ebé mak iha hanoin atu forma Governu maibé labele sakrifika tan Orsamentu Jerál Estadu (OJE) tanba orsamentu duodésimu mós atu ramata ona.

“Ba PLP importante liu mak koligasaun polítika ida-ne’e bele fó solusaun imediata. Signifika, PLP sei la impede koligasaun foun ne’ebé mak iha hanoin atu forma Governu maibé dala-ida tan labele sakrifika Orsamentu Jerál Estadu no agora duodésimu mós atu hotu ona. Sira (koligasaun foun) tenke book-an lalais, se sira haree katak sira bele viabiliza ona koligasaun foun ida atubele solusiona impase ne’e iha tempu badak nia laran,” Maria Angelina ba jornalista sira iha resintu Parlamentu Nasionál, ohin.

Nia hateten, koligasaun foun ne’e bele fó solusaun imediamente ka lae, responsabilidade ne’e fila ba partidu CNRT ne’ebé mak lidera koligasaun foun ne’e. Maibé, nia dehan, haree hosi baze jurídiku koligasaun foun ne’e kontra lei partidu polítiku númeru 3/2005 artigu 9.

“Ida-ne’e koligasaun polítika la’ós koligasaun ida-ne’ebé ho baze legál. Se koligasaun polítika ne’e katak atu rezolve impase polítika ne’ebé ita hasoru no Prezidente Repúblika soe mai partidu polítiku sira iha bankada Parlamentár halo movimentu hodi ko’alia ba malu para oinsá buka solusaun hodi rezolve impase naruk ne’ebé ita hasoru,” nia deha.

Nia hatutan, partidu CNRT rasik mak deklara Aliansa Mudansa Ba Progresu (AMP) sei eziste bainhira Primeiru-Ministru, Taur Matan Ruak, dehan iha 20 janeiru deputadu CNRT sira mak baku-mate AMP.

“Loron seguinte fali CNRT mak deklara dehan AMP sei eziste no atu anula ezisténsia AMP nian tenke liuhosi konferénsia hosi partidu tolu ne’e (CNRT, PLP no KHUNTO). Ne’e, CNRT mak deklara la’ós ami (PLP). Maibé, hosi sorin seluk, CNRT mak harii uluk koligasaun ida. Ida-ne’e mak ami kestiona. Tanba, ami hatene dehan laiha ona. Ami la’ós dehan labele harii koligasaun ida, bele. Maibé, importante liu ba ami mak koligasaun ida-ne’e bele hamate tiha krize polítika ida-ne’e,” nia hateten.

Terseira Vise-Prezidente Partidu Libertasaun Populár (PLP) ne’e salienta, PLP prontu sakrifika tun hosi Governu maibé importante mak CNRT bele fó solusaun ba impase polítika ne’ebé la’o tempu naruk ne’e.

Notísia Relevante: Partidu Lima Hamutuk ho CNRT Asina Ona Akta Koligasaun Foun

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here