Prezidente Republika, Francisco Guterres Lu Olo.Imajen/Antonio Goncalves

DILI, 24 fevereiru 2020 (TATOLI)–Prezidente Repúblika (PR), Francisco Guterres “Lú Olo” deklara, Taur Matan Ruak nu’udár Primeiru-Ministru no VIII Governu Kontinua válidu tanba to’o oras ne’e Taur Matan Ruak seidauk hakerek Karta rezignasaun.

“Primeiru-Ministru Taur Matan Ruak la rezigna-aan ida. Até Prezidente Repúblika hateten dala barak ona katak Governu mantein nafatin, Primeiru-Ministru mantein nafatin. To’o agora ha’u sei ko’alia nafatin katak mantein nafatin,” dehan PR Lú Olo ba jornalista sira hafoin hala’o abertura ba Konferénsia Nasionál Komisaun Antí Korrupsaun (KAK) iha salaun Ministériu Finansas Aitarak Laran, Dili, ohin.

Prezidente Repúblika rekoñese katak, antes ne’e Primeiru-Ministru hakerek duni Karta ba Xefe Estadu maibé la husu demisaun.

“Ha’u hatene katak, antes ne’e nia hakerek hodi informa kona-ba situasaun Governu, depois de Orsamentu Jerál Estadu 2020 sumba iha Parlamentu Nasionál maibé la husu rezignasaun. Nune’e mós hakerek atu mantein hanesan Primeiru-Ministru ho plena (atribui) funsaun,” PR Lú Olo haktuir.

Tanba ne’e, atu demite ka la demite, Xefe Estadu hateten, ne’e kompeténsia Primeiru-Ministru no bainhira Governu iha plena funsaun laiha data ida ne’ebé fó limitasaun.

Nia hatutan, atu formasaun Governu foun, kuandu governu ida laiha tiha ona maibé Governu ida ne’e sei kontinua eziste nafatin, no la’ós Governu Jestaun.

“Governu ida ne’e la’ós Governu jestaun, ne’e VIII Governu ho plenu funsaun nafatin hela de’it. Bainhira Governu Jestaun, signifika katak Governu ne’e husu ninia demisaun ona ou Governu ne’e nia demisaun iha tiha ona, no Prezidente Repúblika dekreta tiha ona. Maibé, realidade Governu ida-ne’e mantein nafatin,” nia esplika.

Antes ne’e, Primeiru-Ministru, Taur Matan Ruak deklara katak sei mantein nafatin hanesan Primeiru-Ministru to’o Governu foun iha.

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here