Adjuntu Komisáriu Komisaun Anti Korrupasaun ba asuntu Prevensaun no Sensibilizaun, José Luis de Oliveira Sampaio. Imajen/TATOLI

DILI, 25 fevereiru 2020 (TATOLI) – Komisaun Anti Korrupsaun (CAC-sigla portugés)  finaliza ona estudu preliminár ne’ebé hala’o iha tinan 2019 ba ministériu 11 no instituisaun autónoma ida atu dezenvolve polítika nasionál ba estratéjia kombate korrupsaun.

Notísia Relevante : KAK Husu PN Aselera Lei Anti-Korrupsaun

Adjuntu Komisáriu KAK ba asuntu Prevensaun no Sensibilizasaun, Luis Oliveira Sampaio, hateten, métodu ne’ebé utiliza iha estudu ne’e mak halo entrevista ba kada instituisaun ema na’in 10 ho total na’in 70, ne’ebé foku kona-ba dezafiu no problema sira durante hasoru.

KAK identifika iha ministériu sira hanesan Ministériu Edukasaun, Ministériu Obras Públika, Ministériu Justisa, Ministériu Planeamentu no Investimentu Estratéjiku, Ministériu Komérsiu no Indústria, Ministériu Agrikultura no Peska iha vulneravel risku ba korrupsaun.

Iha parte krítiku pontu neen (6)  mak KAK identifika durante halo levantamentu mak hanesan  politizasaun iha administrasaun públiku, sistema aprovizionamentu sei fraku, sistema kontrolu internu no externu sei fraku tanba la permite hanesan mídia ho órgaun sosiedade sivíl atu halo kontrolu, desizaun ne’ebé ladún iha kontrolu ko’alia kona-ba nivel diskrisaun signifika ema junior ida bele halo desizaun sein supervizaun hosi superior, tanba ne’e desizaun ne’e bele fó benefísiu ba nia interese pesoál, konflitu interese iha relasaun ho tenderizasaun setór públiku ho privadu atu asesu iha tendénsia hatudu konflitu interese no ikus mak problema jestaun finansas públika sei-dauk di’ak.

“Ho semináriu nasionál durante loron rua, ita halo aprezentasaun estudu preliminár no iha diskusaun sira diretór jerál sira hosi liña ministériu bele fó informasaun liu tan tuir sira nia koñesimentu kona-ba lakuna no defisiénsia sira. Nune’e, hariku liu-tan dokumentu refere hodi elabora polítika nasionál,” esplika Adjuntu Komisáriu KAK, Luis Oliveira Sampaio, ba Ajénsia Tatoli, ohin, iha salaun Ministériu Finansa, Ai-tarak Laran, Dili.

Nia esplika, polítika nasionál nia iha vantajen sei ajuda estadu no membru governu ho kuadru xefia iha instituisaun sira halo sira servisu ho integridade no seguru hodi evita monu ba risku korrupsaun.

Jornalista : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here