Prezidenti da Republika, Francisco Guterres Lu Olo.Imajen/Antonio Goncalves

DILI, 24 fevereiru 2020 (TATOLI)–Prezidente Repúblika (PR), Francisco “Lú Olo” Guterres, haksolok no preokupa ho komemorasaun aniversáriu Komissaun Anti Korrupsaun (KAK) ba dala sanulu (10).

“Ita selebra loron harii Komisaun Anti-Korrupsaun ho laran haksolok tanba ita rejista susesu balun ne’ebé akontese tanba iha esforsu oin-oin husi komisáriu sira hotu ho apoiu husi entidade relevante sira seluk, inklui ajénsia no peritu internasionál sira,”  Prezidente Repúblika espresa ninia sentimentu ksolok liuhosi deskursu iha Konferénsia Nasionál ba Komemorasaun Tinan 10 Funsionamentu KAK, iha Auditóriu Ministériu Finansas, Aitarak Laran, Dili, ohin.

Nia hatutan, nia preokupa tanba nia nota katak iha tempu ohin loron ne’e korupsaun boot ba bebeik iha nasaun nurak Timor-Leste ne’e.

“Ita preokupa ohin loron ho korrupsaun ne’ebé boot ba beibeik iha ita-nia rain, liuliu ho prátika husi ajente públiku sira. Tanba korrupsaun aas, instituisaun sira labele halo serbisu ho efisiénsia no situasaun ida ne’e la favorese negósiu atu hetan susesu,” nia hateten.

Korrupsaun, nia esplika, hamosu instabilidade governativa no atraza dezenvolvimentu ekonómiku iha Timor-Leste. Korrupsaun, tuir nia, la’ós prejudika de’it ekonomia no funsaun administrativa maibé ameasa mós Timor-Leste nia soberania nasionál. Tanba ne’e, labele pratika no labele husik liu lala’ok aat ne’e, liuhusi dalan ne’ebé de’it.

Xefe Estadu mensiona katak, relatóriu barak husi KAK ka husi ONG fó-sai kazu korrupsaun oib-oin inklui ho envolvimentu husi personalidade timoroan no balun kumpre hela sentensa husi tribunál ka kumpre tiha ona.

Ho laran taridu tebes mak Prezidente Repúblika hatete katak, ema hirak ne’e nia atu korruptu fó prejuízu boot tebe-tebes ba Estadu nurak ida ne’e, Estadu ida ne’ebé hamriik ho erói no mártir sira-nia istória murak no nakonu ho sakrifísiu oin-oin.

“La’ós de’it osan lakon iha bolsu privadu mak ha’u preokupa. Ha’u preokupa mós ho valores no prinsípius ne’ebé mihis ba beibeik iha ita-nia rain. Bainhira iha korrupsaun iha nível aas, husi timoroan sira ne’ebé kaer kargu responsabilidade, iha órgaun ka instituisaun Estadu nian, sira halakon-aan nu’udár referénsia di’ak ba funsionáriu públiku sira, ba jerasaun joven sira, ba sosiedade tomak no ba sira-nia família rasik,” PR hateten.

Prezidente Repúblika saliente, tinan-tinan Organizasaun Transparénsia Internasionál publika relatóriu hanaran Indíce de Percepção de Corrupção (IPC) hodi analiza nível korrupsaun iha setór públiku. Relatóriu ne’e define korrupsaun nu’udár “abuzu-de-poder ba fins privadus”.

Bainhira Indise ne’e “100”, país ne’e iha menus korrupsaun maibé iha indise “0” signifika iha korrupsaun aas liu iha país ne’e. Relatóriu ne’e klasifika Timor-Leste nu’udár país ho índise persepsaun korrupsaun iha eskala 30-39, husi 2012 to’o 2018.

Indise di’ak liu akontese iha tinan 2017, katak iha menus korrupsaun duke iha tinan 2016 no 2018. Kompara ho rai ASEAN sira, Timor-Leste iha sétimu lugar. Timor-Leste ninia Índise Persepsaun Korrupsaun di’ak liu Vietname, Laos, Mianmar no Camboja.

“Tuir Índise Persepsaun Korrupsaun, iha tinan 2018, país menus korruptu iha mundu mak Dinamarka, Nova Zelândia no Singapura. Relatóriu anuál seluk ida, publika husi Banku Mundiál, iha tinan 2019, ne’ebé sukat negósiu iha rai atus ida sia nulu (190), fó-sai katak, país tolu ne’e duni, ho ambiente di’ak ba negósiu, mak iha ekonomia di’akliu iha mundu. Ida ne’e signifika katak korrupsaun afeta maka’as dezenvolvimentu país ida nian, liuliu ninia dezenvolvimentu ekonómiku. País ne’ebé nível korrupsaun aas, dezenvolvimentu la la’o ho susesu,” nia sita Índise ne’e.

PR esplika, Timor-Leste iha ona enkuadramentu legál no institusionál balun atu prevene no kombate korrupsaun. Tanba, nia dehan, Parlamentu Nasionál ratifika ona Konvensaun Nasaun Unida hasoru Korrupsaun (UNCAC) liuhusi Rezolusaun Parlamentu Nasional Nú. 25/2008, iha 10 dezembru 2008.

Tinan tuir, harii Komisaun Anti-Korrupsaun ho misaun espesífika atu halo investigasaun kriminál ba krime korrupsaun no krime konekxu.

Alende ne’e, nia temi tan, iha 2009, Dekretu-Lei n. 9/2009 aprova Kódigu Penál Timor-Leste ne’ebé konsidera krime bainhira funsionáriu Estadu sira pratika korrupsaun pasiva, pekulatu, pekulato de uzu, abuzu poder no partisipasaun ekonómika iha negósiu. Krime sira ne’e previstu hotu iha UNCAC. Konvensaun Nasaun Unida kontempla mós krime sira seluk hanesan koasaun, subornu, brankeamentu kapitais no finansiamentu terrorizmu.

Nune’e mós, nia infroma, iha 2009 Parlamentu Nasionál ratifika mós Konvensaun Nasaun Unida hasoru Krime Organizadu Transnasionál no iha 2014,Konvensaun Nasaun Unida ba hakotu Finansiamentu ba Terrorizmu.

Iha 2011, Timor-Leste adopta rejime jurídiku atu prevene no kombate brankeamentu kapitais no finansiamentu terrorismu, no iha 2013, adopta rejime espesiál ba rekolha prova no perda de bens aplikável ba brankeamentu kapitais no finansiamentu terrorizmu, korrupsaun no krime grave sira seluk.

“Timor-Leste presiza hasa’e mós ninia Indise Liberdade Ekonómika tanba, iha tinan 2019, tama iha grupu país sira, klassifikadu nu’udár reprimidu, ho índise 44,2. Iha sosiedade ida ekonómikamente livre, sidadaun sira iha liberdade atu serbisu, prodús, konsome no investe,” nia esplika.

País sira ho liberdade ekonómika, dezenvolve lalais liu iha rendimentu aas liu, dezenvolvimentu umanu aas liu, no korrupsaun mós tuun. Nune’e, ita presiza hatuur leis simples no kuadru legál ida ba ekonomia ne’ebé la iha sátan administrativu ba liberdade ekonómika no investimentu sira.

Nu’udár Xefe Estadu, nia apela, Timor-Leste iha entidade haat ho ida-idak ninia kompeténsia maibé presiza serbisu hamutuk liután atu bele prevene no kombate korrupsaun. Entidade sira ne’e mak Ministériu Públiku, KAK, Unidade Informasaun Finanseira (UIF) no Polícia Científica Investigação Criminal (PCIC).

Notísia Relevante: Prezidente Repúblika Husu PN Aprova Lalais Lei Anti Korrupsaun

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here