Prezidenti da Republika, Francisco Guterres Lu Olo.Imajen/Antonio Goncalves

DILI, 24 fevereiru 2020 (TATOLI)–Prezidente Repúblika (PR), Francisco “Lú Olo” Guterres, husu ba Parlamentu Nasionál (PN), atu Aprova lalais Leí Anti Korrupsaun (LAK) ne’ebé to’o oras ne’e sei iha hela Parlamentu Nasionál .

Prezidente Repúblika husu ba PN, liuhosi ninia deskursu iha Konferénsia Nasionál ba Komemorasaun Tinan 10 Funsionamentu KAK ho tópiku “Kombate Korrupsaun: Timor-Leste Iha Ne’ebé Ona no Atu Ba Ne’ebé Iha Tinan 10 Mai”.

“Ha’u hakarak husu dala ida tan ba deputadu sira atu aprova lalais Lei Anti-Korrupsaun. Projetu-Lei Anti-Korrupsaun tama fali ona iha Meza Parlamentu, iha 9 Jullu 2018. Liuhusi Projetu-lei ne’e, deputadu sira propoin atu estabelese medida foun atu halo prevensaun no oinsá kombate korrupsaun. Projetu-Lei ne’e tama datolu ona no ita hotu hein katak Parlamentu Nasionál sei aprova iha tempu badak, atu kompleta Kódigu Penál ho medida espesiais, atu ita bele prevene no kombate korrupsaun,” Xefe Estadu husu ba PN iha Konferénsia Nasionál KAK nian, ohin.

Nia esplika, korrupsaun ohin loron la’ós ona krime ida ne’ebé izoladu no individualizadu tanba nível korrupsaun iha mundu aas tebe-tebes.

Tuir nia, globalizasaun, teknolojia foun, dezenvolvimentu aseleradu, fó oportunidade mós ba prátika krime foun ho rekursu ba meiu ne’ebé sofistikadu no violentu liu; korrupsaun manán dimensaun ne’ebé grave liu no bele iha impaktu ne’ebé boot liu tanba opera ona iha nível ida ne’ebé transnasionál.

“Korrupsaun iha nível mundiál iha mós implikasaun ba seguransa mundiál. Situasaun ida ne’e ezije kooperasaun entre rai sira liuhosi monitorizasaun permanente ba risku sira. Konvensaun Nasaun Unida hasoru Korrupsaun (UNCAC), liuhusi artigu 5, hatuur matadalan ba Estadu-parte hotu-hotu atu ida-idak dezenvolve ninia Estratéjia Nasionál ida hodi prevene no kombate korrupsaun,” Xefe Estadu subliña.

Timor-Leste nu’udar Estadu Parte UNCAC nian, nia subliña tan katak iha obrigasaun atu dezenvolve Polítika Nasionál Anti-Korrupsaun hodi asegura Estadu Demokrátiku ho kultura ida ne’ebé forte hasoru korrupsaun hanesan hatuur ona iha Vizaun KAK nian.

Atu hametin kultura forte hasoru korrupsaun, nia dehan, Timor-Leste presiza hatuur ajenda nasionál ida hamutuk. Ajenda nasionál ne’e mak Planu Estratéjiku Nasionál Anti-Korrupsaun ida ne’ebé sistemátiku no integradu, atu orienta instituisaun hotu-hotu la’o hamutuk ho vizaun KAK nian.

Xefe Estadu mós rekoñese katak, luta hasoru korrupsaun la’ós fásil no dala barak la haree ka la sente hahalok aat ne’e. Tanba ne’e, ho Estadu Timor-Leste nia naran, PR Lú Olo husu ba sidadaun hotu-hotu atu matan-moris iha ida-idak ninia fatin no iha momentu ne’ebé de’it, hotu-hotu tenke haka’as-aan hamutuk atu luta lesuk hasoru inimigu boot ida ne’e.

“Ha’u fiar katak Timor-Leste bele hiit-an nu’udár rai ezemplár ida ne’ebé hatudu dalan ba rai sira ne’ebé nível dezenvolvimentu la’o neineik loos ka kiik tebes tanba nível korrupsaun aas. Ita bele prova katak País kiik bele mós iha governasaun ezemplár,” nia hateten.

Atu hetan susesu iha ninia misaun, Xefe Estadu husu katak KAK presiza apoiu husi órgaun soberania hotu-hotu liuliu husi Parlamentu Nasionál ho ninia knaar lejislativu, fiskalizadór no tribunál sira.

“Presiza entidade relevante no sidadaun sira-nia apoiu atu tau matan ba área krítika sira ne’ebé iha risku ba prátika korrupsaun, hanesan Alfândegas, Aprovizionamentu Públiku, Infraestruturas no Investimentu Públiku sira. KAK presiza partisipasaun ativa husi sosiedade sivíl, mídia no setor privadu sira,” nia esplika.

Nia haktuir, iha evidénsia katak país sira ne’ebé la limita liberdade imprensa no direitu sidadaun sira-nian atu espresa-aan mak iha liu susesu iha luta hasoru korrupsaun. Tanba, tuir nia, povu nia lian importante tebes iha misaun prevene no kombate korrupsaun.

“Ha’u hakarak fó-hanoin dala ida tan: Enkuadramentu legál no institusionál de’it la to’o. Instituisaun sira presiza mós meiu, Lei Anti-Korrupsaun forte no efisiente no Estratéjia Nasionál di’ak ida atu Prevene no Kombate Korrupsaun. Ha’u fiar katak, konferénsia ida ne’e sei forma ekipa efisiente ho parte relevante hothotu atu haree asuntu sira ne’e hotu no nakfilak misaun KAK nian ba ita hotu nian, tuir regra no lei sira ne’ebé ita hatuur ona ka sei hatuur no hametin ba beibeik,” Xefe Estadu ne’e haklaken.

Partisipa iha Konferénsia Nasionál ne’e, Prezidente Tribunál Rekursu, Prokuradór Jerál Repúblika, eis titulár sira, deputadu sira kinta lejislatura, membru oitavu governu konstitusionál, reprezentante organizasaun Internasionál no Nasionál, sosiedade sivíl, reprezentante estudantes husi eskola públiku no privada sira, mídia no konvidadu sira seluk.

Jornalista : Cipriano Colo

Editó        : Cancio Ximenes

1 KOMENTÁRIU

  1. Oinsa ho Nai PR nb aprova Osan millaun Ida resin iha 2017 ba ninia a’an hd hatama ba konta PF hd halo kampanha iha EA, n KKN ka Lae?

HAKEREK NO HATÁN

Please enter your comment!
Please enter your name here