iklan

NASIONÁL, DEFEZA, DILI, HEADLINE, POLÍTIKA, SEGURANSA

F-FDTL ho PNTL Kumpre Desizaun Governu Reativa GAM

F-FDTL ho PNTL Kumpre Desizaun Governu Reativa GAM

Foto hamutuk membru PSHT ho membru IKS. imajen/Espesiál husi kronolojia Facebook Jinho Pmc

DILI, 24 fevereiru 2020 (TATOLI)- Komandu FALINTIL-Forsa Defeza Timor-Leste (F-FDTL) ho Komandu Polisia Nasionál Timor-Leste (PNTL), prontu koopera no submete ba desizaun VIII Governu Konstitusionál hodi reativa Organizasaun Grupu Arte Marsiál (GAM) iha Timor-Leste.

Notísia Relevante : KM Aprova Rezolusaun Reativa Arte-Marsiál

Komandante Jeral F-FDTL, Major Jeneral Lere Anan Timur.Imajen/Antonio Goncalves

Xefe Estadu Maiór Jenerál F-FDTL, Majór Jenerál Lere Anan Timur dehan, desizaun governu hodi reativa atividade GAM ne’e konsege realiza, hafoin nia parte hakerek karta ida ba Primeiru Ministru, Taur Matan Ruak, hodi foti desizaun iha Konsellu Ministru.

Lere dehan, reativa GAM tolu hanesan, Persaudaraan Setia Hati Terate (PSHT), Ikatan Kera Sakti (IKS) no Kmanek Oan Timor Rai Klaran (KORK) hodi fasilita governu no forsa rua bele halo kontrolu di’ak liután ba organizasaun ho nia membru bainhira halo konflitu no krime ruma.

“Ha’u propoin ne’e kerdizér ha’u apoia reativa, tanba arte marsiál ne’e ema Indonézia sira mak tau iha ne’e la’ós ita nian, tanba ida ne’e mak sira ba jura iha ne’ebá ne’e mak ha’u hanoin katak ida ne’e vantajen ida ne’ebé  agora ita bele organiza no bele kontrola,”  hateten Lere Anan Timur ba jornalista, foin lalais ne’e, iha salaun Auditóriu CNE.

Lere apela ba lider organizasaun sira atu koopera ho governu para bele halo kontrolu másimu ba membru sira atu hapara kualkér violénsia no krime.

“Ha’u prontu kontaktu ha’u nian kolega (jenerál TNI) labele dehan se ami nian ema mai halo juramentu iha imi nian rai, imi nian pozisaun saida para sira mós bele ajuda ita kontrola ita nian situasaun,” dehan Lere.

Jenerál F-FDTL ne’e apela ba membru grupu GAM sira tenke aproveita sira nia organizasaun uza ba atividade desportiva hodi promove sira nia aan no hamorin naran Timor-Leste.

Komandante ne’e hatutan, mezmu governu reativa organizasaun GAM tolu ne’e, la signifika organizasaun sira ne’e atu kontinua halo problema ba malu, tanba F-FDTL no PNTL sei halo kontrolu másimu bazeia ba lei númeru 5/2017.

Komandante Komandu Operasionál Nasionál (KKON), Superintendente Xefe, Pedro Belo. Imajen/Eugénio Pereira

Iha fatin hanesan, Komandante Operasaun Nasionál PNTL, Superintendente Xefe, Pedro Belo dehan, Komandu PNTL mós prontu koopera ho desizaun governu nian.

“Saida maka governu deside ona polisia tenke halo tuir,” dehan Pedro Belo, ohin, iha Kuartél Jerál PNTL.

Pedro hatutan, mezmu governu reativa ona GAM, maibé karta ne’e seidauk públika iha Jornál da Repúblika, tanba ne’e PNTL kontinua ezekuta nafatin lei Arma Branka númeru 7/2017.

“Rezolusaun governu bele muda, maibé aplikasaun lei númeru 5/2017 ami aplika nafatin,” tenik nia.

Primeiru Ministru Taur Matan Ruak, foin lalais ne’e, liuhosi Reuniaun Konsellu Ministru aprezenta proposta revogasaun (hamoos) Rezolusaun Governu nian númeru 16/2013, loron 10 fulan-Jullu kona-ba bandu ba GAM hanesan PSHT, KORK & KERA SAKTI.

Jornalista : Eugénio Pereira

Editór       : Francisco Simões

iklan
iklan

Leave a Reply

iklan
error: Content is protected !!