Xefe Bankada Partidu Demokrátiku (PD), António da Conceição ‘Kalohan'. Imajen TATOLI/António Gonçalves

DILI, 21 fevereiru 2020 (TATOLI)—Sekretáriu Jerál Partidu Demokrátiku (PD), António “Kalohan” da Conçeição hateten, ohin, posivelmente fó-sai koligasaun foun ne’ebé lidera hosi Partidu Congresso Nacional da Reconstrução de Timor (CNRT).

Kalohan hatutan, PD hanoin katak Eleisaun Antesipada sei rezulta de’it susar ba povu entaun konferénsia nasionál estraordinária horisehik hola ona desizaun.

“Posivelmente loron mak ida ohin (sesta-feira). Funsionáriu sira bele sai ona serbisu, tuur netik iha televizaun hodi ami fó esperansa ba povu kona-ba koligasaun foun ne’ebé lidera hosi CNRT,” Kalohan informa ba jornalista sira iha Tuana-Laran, Dili, ohin.

Kalohan haktuir, desizaun ne’ebé PD hola mak ne’e rezumidamente iha munisípiu 10 mak deside unanimamente hakarak atu ba hamutuk ho CNRT. Iha munisípiu rua mak la deside maibé entrega ba partidu mak hola desizaun tanba sira fó konfiansa ba partidu.

Entretantu, kuadru no estrutura PD husi Munisípiu Baucau entrega ba Prezidente Repúblika atu deside, Munisípiu Ainaro no Viqueque entrega ba partidu mak deside.

“Ne’ebé hosi maioria ne’ebé mak deside tenke ba hamutuk ho CNRT no Partidu Demokrátiku nia pozizaun, ida-ne’e ami formaliza ho ami-nia karta entrega ba CNRT hodi lidera koligasaun foun. Ne’e komprova katak ami iha ona desizaun no CNRT mak sei lidera koligasaun,” nia dehan.

Kona-ba lista pendente membru governu ne’ebé Prezidente Repúblika la fó pose, Sekretáriu Jerál PD ne’e hateten, VIII Governu iha Primeiru-Ministru seluk no sertamente IX Governu iha Primeiru-Ministru seluk.

“Purtantu estratéjia Primeiru-Ministru ida ba Primeiru-Ministru seluk ne’e konserteza sei la hanesan no natureza Governu mós sei la hanesan. Iha VIII Governu se iha ema na’in-sia pendente ne’e la signifika konsiderasaun ne’e la influénsia nafatin situasaun ne’ebé ita hasoru,” nia hateten.

Nia afirma, koligasaun ne’ebé PD hamutuk CNRT ho intensaun atu evita Eleisaun Antesipada (EA) maibé kuandu laiha tán entendimentu no iha tán impedimentu oin-oin, sertamente impedimentu hirak ne’e mak lori ba Eleisaun Antesipada, la’ós koligasaun ne’ebé lidera hosi CNRT ne’e mak provoka EA.

Maske esperiénsia moruk hatudu katak iha loron horisehik CNRT soe PD iha dalan klaran, maibé Sekretáriu Jerál PD ne’e hateten katak ida-ne’e akontese tanba interese nasionál ba fronteira marítima.

Notísia Relevante: Rezultadu Husi Konferénsia, PD Prefere Governu Grande Inkluzaun

Jornalista : Evaristo Soares Martins

Editór        : Cancio Ximenes

HAKEREK NO HATÁN

Please enter your comment!
Please enter your name here