DILI, 20 fevereiru 2020 (TATOLI)—Kuadru no estrutura Partidu Demokrátiku (PD) husi munisípiu 12 no Rejiaun Administrativa Oé-Cusse Ambeno (RAEOA), prefere Governu Grande Inkluzaun hodi solusiona impase polítika.

“PD nia hanoin, ita garante Governu inkluzaun ida-ne’ebé ke bele envolve maun-boot sira iha laran hotu para depois ita hakat liu impase tinan rua ne’e, hodi ita bele la’o hamutuk bá-oin. Durante ami halo dálogu ho sira maibé sira lakohi. Ami mós bele oferese ami-nia an karik imi ho imi lakohi tuur hamutuk,” Prezidente PD, Mariano “Assanami” Sabino, informa liuhosi konferénsia imprensa hafoin ramata Konferénsia Nasionál Ekstraordinária iha sede PD, Colmera, ohin.

Nia hatutan, PD simu proposta rua mak ida hosi CNRT no ida hosi PLP. Ohin, nia infroma, koletivamente PD haruka karta ba partidu rua ne’e no sei sumariza hanoin ne’ebé hato’o hosi kuadru no estrutura husi munisípiu maibé rezultadu hosi konferénsia ohin, aban ka bainrua mak PD fó-sai ba públiku.

Maibé, tuir informasaun ne’ebé Agência TATOLI asesu katak maioria estrutura munisípiu 12 no RAEOA hili opsaun hamutuk ho CNRT.

Entretantu, Prezidente PD, Mariano “Assanami” Sabino, seidauk fó-sai rekomendasaun hosi kuadru no estrutura PD husi munisípiu maibé prezidente PD dehan de’it sei sumariza hafoin fó-sai ba públiku.

Desizaun ne’e, nia dehan, deside liuhosi Konferénsia Nasionál Extraordinária ho tema “PD Ba Estadu”. Molok foti desizaun, estrutura nasionál rona intervensaun hosi estrutura munisipál sira tanba iha opsaun rua mak PD tenke hili mak bá hamutuk ho PLP ka hamutuk ho CNRT.

Konferénsia nasionál ne’e dirije hosi Prezidente PD, Mariano “Assanami” Sabino, Sekretáriu Jerál, António da Conceição no Konsellu Polítika Nasionál (CPN) PD nian.

Konferénsia Nasionál Extraordinária ne’ebé hahú hosi tuku 14.00 to’o tuku 16.00 iha sede Partidu Demokrátiku (PD) ne’e, partisipa hosi kuadru no estrutura husi munisípiu 12 no RAEOA hanesan Viqueque, Manufahi, Lautém, Liquiçá, Aileu, Ainaro, Bobonaro, Dili, Baucau, Ermera no Covalima.

Konferénsia Nasionál Extraordinária ne’e mós partisipa hosi estrutura nasionál no militante Partidu Demokrátiku (PD) nian kuaze atus tolu.

Notísia Relevante: Xanana Gusmão Fó Garantia Ba Partidu Demokrátiku

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here