Xefe Bankada Partidu Demokrátiku (PD), António da Conçeição ‘Kalohan'. Imajen/ Egas Cristovao

DILI, 18 fevereiru 2020 (TATOLI)—Prezidente Partidu Congresso Nacional de Reconstrução de Timor (CNRT), Kay Rala Xanana Gusmão, fó grantia ba Partidu Demokrátiku (PD) hodi ultrapasa situasaun polítika atuál.

“Ohin, ami enkontru ho Prezidente Partidu CNRT, Xanana Gusmão, konkretamente buat ne’ebé ami ko’alia ho CNRT fó garantia ida oinsá maka atu ultrapasa situasaun ida-ne’e. Maun Boot Xanana Gusmão nia disponibilidade atu hamriik iha oin hodi ultrapasa situasaun ida-ne’e, atu devolve filafali konfiansa ba povu no konfiansa atu ita bele hala’o dezenvolvimentu nasionál ba ita-nia rain,” dehan Sekretáriu Jerál PD, António “Kalohan” da Conçeição ba jornalista sira iha Sede PD, Kolmera, ohin.

Nia hatutan, Xanana Gusmão tenke hamriik iha oin atu nune’e ema hotu bele tuur hakmatek filafali no bele hala’o moris hanesan bain-bain. Tanba, nia dehan, proposta konkreta mai husi CNRT ne’ebé posivelmente CNRT bele lidera koligasaun.

“Ida-ne’e proposta konkreta mai tiha ona hosi CNRT atu posivelmente CNRT lidera koligasaun ida. Maibé, integrasaun membru sira-ne’e sei hein halo komunikasaun ho kada partidu. PD la reprezenta partidu sira seluk, ami ko’alia parte PD ninian,” nia dehan.

Tuir nia, proposta ne’ebé PD propoin ba Prezidente Partidu CNRT, Kay Rala Xanana Gusmão, mak Governu ida-ne’ebé mak tenke asegura estabilidade, asegura kontinuidade hodi kompleta restu mandatu tinan-lima nian, ne’ebé mak povu fó fiar ba eleisaun antesipada liubá.

“CNRT rasik mak sei buka tan sé-sé maibé buat ne’ebé mak ami ko’alia reprezenta Partidu Demokrátiku nian de’it hodi dehan katak PD tenta kontribui ba iha solusaun hodi hakotu lai impase polítika ne’e,” nia hateten.

Sekretáriu Jerál PD ne’e afirma, diferensa sira-ne’e mak iha ezisténsia partidária nian ema hotu kontesta ne’e, iha eleisaun maibé rezultadu eleisaun iha tiha ona, agora tenke halo jestaun ba konfiansa ne’ebé povu fó ona liuhosi Eleisaun Antesipada.

“Maun-Boot Xanana mak sei ko’alia. Maibé, Maun-Boot iha dezeju ida hodi forma koligasaun ida hodi bele fó rohan ba impase atuál. Ami hakarak Governu ida bele asegura estabilidade tanba ida-ne’e ami sei iha prosedimentu ami-nian iha partidu nia laran atu hola desizaun ba ida-ne’e,” nia informa.

Sekretáriu Jerál PD ne’e fó-sai katak, aban no bainrua sei iha enkontru maratona iha PD nia laran hodi hola opsaun ba nasaun no povu nia problema.

“Ami seidauk to’o iha konkluzaun ida atu avansa ho sé. Governu sé mak atu lidera. CNRT mak atu lidera ka FRETILIN mak atu lidera. Importante mak loke tiha ona komunikasaun entre CNRT ho FRETILIN no ami hatene ona intensaun hosi partidu rua ne’e hotu, oin núsa mak atu fó solusaun ba ita-nia problema,” nia dehan.

Nia haktuir, PD fiar Xanana Gusmão tanba konsege rezolve problema sira iha 2006 nian no Xanana konsege fó konfiansa ba Partidu Demokrátiku. Tanba ne’e, nia esplika, PD laiha dúvida la’o hamutuk ho Maun-Boot Xanana Gusmão.

“Ohin loron, ema hotu hein Xanana Gusmão. Tanba, labele dúvida atu la fiar fali ba Xanana ne’ebé iha kapasidade atu rezolve problema sira-ne’e hotu,” nia akresenta.

Maibé, nia informa, seidauk to’o iha konkluzaun tanba buat hotu-hotu foin mak abertura komunikasaun no foin mak tama iha prosesu negosiasaun. PD halo komunikasaun polítika ida-ne’e tanba PD hakarak defende interese povu nian.

Notísia Relevante: PD Buka Entendimentu FRETILIN Ba Situasaun Polítika Atuál

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here