Xefe Bankada Partidu Demokrátiku (PD), António da Conçeição ‘Kalohan'. Imajen/ Egas Cristovao

DILI, 18 fevereiru 2020 (TATOLI)—Partidu Demokrátiku (PD) buka entendimentu ho Frente Revolusionária Timor-Leste (FRETILIN) nian hodi fó solusaun ba impase polítika iha rai-laran.

Agora daudaun ne’e, nia hatutan, PD loke komunikasaun polítika, tanba ne’e mak PD haruka duni karta ba Partidu FRETILIN no môs ba Parrtidu CNRT hodi tenta loke komunikasaun polítika atu buka saida maka entendimentu.

“Iha soru-mutuk ne’e, ita bele hetan entendimentu ida tanba situasaun ida-ne’e sertamente ita labele kontinua hanesan ne’e. Tanba, povu mak sai vítima,’ dehan Sekretáriu Jerál PD, António “Kalohan” da Conceição ba jornalista sira hafoin hasoru malu ho Sekretáriu Jerál FRETILIN, Marí Alkatiri iha sede CCF, Comoro, Dili, ohin.

Tanba ne’e, nia infroma, hanesan partidu ida iha devér atu buka ko’alia ba malu no solusaun ne’e depende ba vontade maibé ida-ne’e la signifika PD buka ona forma koligasaun.

Nia hateten, PD espresa hanoin balun ba Sekretáriu Jerál FRETILIN, Marí Alkatiri, hanesan mós partidu opozisaun ne’e, PD informa ona ba Prezidente Repúblika katak diálogu mak bele rezolve situasaun polítika atuál.

Tanba, tuir nia, PD respeita desizaun ne’ebé Prezidente Repúblika inísia ona katak partidu polítiku sira buka-malu hodi halo movimentu polítiku.

Sekretáriu Jerál PD ne’e mós fó-sai katak, ideia ne’ebé PD informa ba FRETILIN hanesan mós buat ne’ebé  PD informa ba Partidu CNRT.

Nia dehan, iha loron 60 partidu polítika sira tenke iha kapasidade buka entende malu nune’e bele evita Eleisaun Antesipada (EA) akontese tan iha Timor-Leste.

“Se ami laiha entendimentu dalan mak tenkeser ba Eleisaun Antesipada (EA). Hanesan partidu, ami preparadu. Ami hatene dehan katak ami la’ós kestaun atu halo kapasidade organizasaun maka ami laiha tanba ami hatene no eziste ona tinan 19,” nia dehan.

Maibé, nia esplika, Partidu Demokrátiku preokupadu ho situasaun ida-ne’e tanba la’ós Eleisaun Antesipada (EA) mak sai pontu finál atu bele fó solusaun [rohan] ba situasaun polítika atuál.

Iha fatin hanesan, Sekretáriu Jerál FRETILIN, Marí Alkariri hateten, FRETILIN la interesadu atu asalta podér iha momentu ne’e maibé fundamentál ba sentidu Estadu tanba krize afeta ba povu nia moris no FRETILIN laiha vontade ba Governu foun.

“FRETILIN la presiza koligasaun ka la koliga para halo nia serbisu. Fretilin ninia aliadu mak povu, nia tun daudaun ba povu. Maibé, FRETILIN iha sentidu responsabilidade tenke buka hamutuk sira seluk, buka solusaun ida atu sai hosi impase ne’e,”  Alkatiri hateten.

Iha soru-mutuk ne’e, parte PD lidera hosi Sekretáriu Jerál, António da Conceição, Adriano do Nascimento no Arcanjo Leite no husi parte FRETILIN nian lidera hosi Sekretáriu Jerál, Marí Alkatiri no Adjuntu Sekretáriu Jerál, José Reis.

Notísia Relevante: Iha Tempu Badak PD Sei Hasoru FRETILIN-CNRT

Jornalista  : Evaristo Soares Martins

Editór        : Cancio Ximenes

HAKEREK NO HATÁN

Please enter your comment!
Please enter your name here