Kandidatu Ofisial Inspetór Asistente Polisia Nasionál Timor-Leste (PNTL) na’in 53 tuir ona kursu durante fulan sia (9) iha Sentru Formasaun Polisia (SFP) Comoro Dili. Imajen/MI

DILI, 18 fevereiru 2020 (TATOLI)-Komandu Polísia Nasionál Timor-Leste (PNTL) klarifika katak prosesu promosaun diviza ne’ebé hala’o ba komandante sira hodi prenxe vaga komandu fó-sai ona tuir duni rekizitu.

Lista naran vaga promosaun diviza ne’ebé Agência Tatoli asesu husi Komandu PNTL, ohin,  haktuir katak promosaun husi postu Superintendente ba Superintendente Xefe ne’ebé aprova husi Komandante Jerál Polísia Nasionál Timor-Leste (PNTL), Komisáriu Faustino da Costa, ba na’in-13, maibé na’in-hitu (7) mak sei prenxe vaga hitu ne’ebé komandu presiza.

Aprovasaun husi Komisáriu Faustino da Costa ne’e iha loron 28 janeiru 2020 ho despaixu Númeru 86/CG-PNTL/I/2020.

Komisáriu  Faustino da Costa, hateten, promosaun ne’e hala’o bazeia ba lei hodi promove membru sira ne’ebé kontribui ativu  ba progresu Instituisaun PNTL.

“Ida-ne’e promosaun normál ida, ita halo tuir lei atu responde de’it ba prosesu ida ho ninia modalidade promosaun por-escolha hodi realiza iha loron 27 marsu agora,” hateten Komisáriu Faustino da Costa, ba jornalista sira iha Kuartél Jerál PNTL, Caicoli, Dili, segunda (17/02/2020).

Tuir lista ne’ebé fó-sai husi Komandu PNTL katak komandante na’in-hitu (7) ne’ebé atua ho diviza Superintendente daudaun ne’e tama kritériu ho valór di’ak atu promove ba Superintendente Xefe mak hanesan, Superintendente Saudozu Lino da Silva Saldanha ho ID 10035 ho rezultadu apresiasaun 15,45, Superintendente Arguimino Ramos ho ID 10404 no apresiasaun 1528, Superintendente, Arnaldo de Jesus A.C. Araújo ho ID 10310 no apresiasaun 15,21, Superintendente Orlando Gomes ho ID 10129  no apresiasaun 14,87, Superintendente, Agostinho Gomes da Silva ho ID 10722 ho apresiasaun 14,86 Superintendente, Mateus Assunção Mendes ho ID 10340 no apresiasaun 14,67 no Superintendente, Natércia Eufrásia Soares Martins ho ID 10147 no apresiasaun 14,45.

Iha mós  lista naran promosaun diviza ho postu Inspetór ba Inspetór Xefe  na’in-32 maka liu ne’ebé aprova ona husi Komisaun Promosaun PNTL bazeia ba Diploma Ministeriál Númeru 9/2017, 15 Fevereiru, ne’ebé asina husi Segundu Komandante Jerál PNTL, Komisáriu Mateus Fernandes, iha loron 13 fevereiru 2020.

Membru sira ne’ebé liu ne’e tuir ona teste iha jullu 2019 hodi prenxe kritériu hanesan testu selesaun ba dokumentu, teste eskrita, teste saúde no teste entrevista.

Tuir planu, membru sira-ne’e sei hetan promosaun diviza iha aniversáriu PNTL  nian iha loron 27 marsu 2020.

PNTL Promove Superintendente Na’in-13 ba Superintendente Xefe

Jornalista : Eugénio Pereira  

Editór        : Francisco Simões

1 KOMENTÁRIU

HAKEREK NO HATÁN

Please enter your comment!
Please enter your name here