Polisia indentifika ona autor ne'ebé hakerek Xanana nia naran iha parede lolon sira iha Dili laran. Imajen/Eugénio Pereira

DILI, 18 fevereiru 2020 (TATOLI)–Polísia Nasionál Timor-Leste (PNTL) identifika ona autór ne’ebé hakerek líder rezisténsia, Kay Rala Xanana Gusmão nia naran iha parede sira iha Kapitál Dili.

Notísia Relevante : Hakerek Naran Xanana iha Parede, PNTL Konsidera Propaganda no Ajitasaun

Ema deskoñesidu hakerek lider karizmatiku Kay Rala Xanana Gusmão nia naran iha parede lolon sira iha Dili laran. Imajen/Eugénio Pereira

PNTL konsege halo identifikasaun ba autór ne’e liuhusi gravasaun  kamera Closed Circuit Television (CCTV) ne’ebé Polísia Nasionál Timor-Leste (PNTL) monta iha sidade Dili nia laran.

Komandante PNTL Munisípiu Dili, Superintendente Xefe, Armando Monteiro dehan, daudaun ne’e ekipa investigadór no Servisu Informasaun Polísia (SIP) kontinua buka tuir autór ninia paradeiru iha Dili hodi hein mandadu kapturasaun.

“Ita identifika ona iha área tolu, ne’ebé ami sei servisu hamutuk ho ita-nia IT PNTL haree vídeo ne’e para aprezenta  no  buka tuir autór no identifika ninia lokalidade para foti medida tuir lei,” hateten Armando Monteiro, ohin, ba jornalista iha Komandu Polísia, Caicoli, Dili.

Armando dehan, bainhira ema ruma pinta líder sira-nia naran iha moru ka difama líder sira kontra lei ijiene públiku no lei órden públika númeru 33/2008 hodi prosesa tuir lei.

Nia hatutan, bainhira riska liafuan la edukativu ka hakerek líder sira-nia naran iha fatin públiku sein autorizasaun husi na’in, ne’e viola lei no hafo’er imajen kapitál Dili.

Fatin públiku ne’ebé CCTV PNTL identifika autór sira riska naran Xanana maka área Colmera, Palásiu Governu no fatin balun tan.

Tuir observasaun Agência Tatoli, nota katak, liafuan ne’ebé ema deskoñesidu sira hakerek iha parede lolon kapitál Dili,  hanesan, Avó Nana Sempre iha Ami Nia Fuan, I Love Xanana, Viva Xanana no liafuan seluk tan.

 Jornalista         : Eugénio Pereira  

Editór                : Francisco Simões

HAKEREK NO HATÁN

Please enter your comment!
Please enter your name here