Inan Feton ida haree hela parede ne'ebé ema deskoñesidu hakerek lori naran Xanana iha parede sira iha Dili laran. Imajen/Eugénio Pereira

DILI, 17 fevereiru 2020 (TATOLI)- Komandu Polisia Nasional Timor-Leste (PNTL) sei koordena ho Governu atu hamoos  tiha letra sira ne’ebé mak ema deskoñesidu hakerek naran Xanana nian iha parede lolon sira iha kapitál Dili. Tanba PNTL konsidera hahalok sira ne’e hanesan aktu propaganda no ajitasaun polítiku ne’ebé ema balun lansa.

Komandante Jerál PNTL, Komisáriu Faustino da Costa. Imajen/Eugénio Pereira

Komandante Jerál PNTL, Komisáriu Faustino da Costa,  ohin, ba jornalista sira iha Kuartél Jeral PNTL, Caicoli, Dili, hateten, letra sira ne’ebé hakerek iha parede lolon iha Dili laran hodi lider karizmátiku Xanana nia naran, foin mak halo iha semana nee nia laran.

Komisáriu Faustino da Costa, orienta ona komandante sira atu haree situasaun sira ne’e, tanba PNTL konsidera mós hakerek naran iha moru lolon ne’e parte balun husi aktu ajitasaun polítika.

PNTL identifika ona área sira ne’ebé ema hakerek naran Xanana barak liu mak iha área Palásiu Governu nian, edifísiu Uniaun Europeia, área Taibesi, Kolmera no fatin balun tan.

Iha tinan 2019, Komandu PNTL koordena ho Sekretáriu Estadu Juventude Desportu (SEJD) no membru Konsellu Polisiamentu Komunitáriu (KPK) hodi hamoos ona liafuan la edukativu ne’ebé ema hakerek arbiru moru lolon sira iha kapitál Dili.

Faustino da Costa husu ba joven sira ne’ebé iha  kriativu sira atu pinta ho hakerek  tenke hakerek ou pinta liafuan ne’ebé pozitivu hodi bele eduka ema seluk,  inklui pinta pintura ne’ebé di’ak ba sosiedade bainhira haree arte ida.

 Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here