Prezidente Interinu PLP, Abrão Freitas 'Mate Restu' ko'alia ba mídia hafoin hala'o enkontru ho Prezidente Repúblika, Francisco Guterres Lú Olo. Imajen Tatoli/ Egas Cristóvão

DILI, 24 janeiru 2020 (TATOLI)–Partidu Libertasaun Populár (PLP), fó apoiu tomak ba Xefe Estadu, Francisco Guterres Lú Olo, atu foti desizaun ba situasaun polítika atuál.

Primeiru Vise-Prezidente PLP, Abrão Freitas ‘Mate Restu’, hanesan mós atuál Prezidente PLP Interinu ko’alia asuntu ne’e, hafoin lidera kuadru PLP hasoru malu ho Prezidente Repúblika iha Palásiu Prezidente Nicolau Lobato, Bairru Pité, Dili, ohin.

“Iha semana kotuk, ita-nia Orsamentu Jerál Estadu (OJE) 2020 xumba iha Parlamentu Nasionál. Tanba ne’e mak Prezidente Repúblika konvida Partidu Libertasaun Populár atu informa de’it situasaun atuál liuliu kona-ba orsamentu ne’e. Pozisaun PLP maka ne’e, kompeténsia tomak tuir Konstituisaun RDTL, absolutamente iha Prezidente Repúblika. Situasaun saida de’it mak Prezidente Repúblika deside, PLP konkorda no fó apoiu másimu. PLP laiha preferénsia ruma”, Abrão deklara.

Nia dehan tan, opiniaun PLP nian kona-ba apoiu Kualkér desizaun Prezidente Repúblika, formalmente hakerek mós iha karta no entrega iha Prezidente Repúblika.

Líder PLP ne’ebé hala’o enkontru ho Prezidente Repúblika lidera husi primeiru Vise-Prezidente PLP, Abrão Freitas ‘Mate Restu’, Segundu Vise-Prezidente, María Angelina Lopez Sarmento, Kintu Vise-Prezidente, Abel Pires, Vise-Prezidente Komisaun Jurídika PLP, Merita Correia, Vise-Prezidente Comissão Política Nacional (CPN), Francisco de Vasconcelos.

Iha tuku 11: 00 otl, Prezidente Repúblika sei rona mós opiniaun husi líder partidu FRETILIN.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here