Xefe Bankada Partidu Demokrátiku, António da Conceicão. Imajen António Goncalves

DILI, 17 fevereiru 2020 (TATOLI)—Dirijente Partidu Demokrátiku (PD) sei hasoru-malu ho partidu Frente Revolusionária Timor-Leste Independente (FRETILIN) no Congresso Nacional de Reconstrução de Timor (CNRT) iha tempu badak nia laran hodi ko’alia kona-ba situasaun polítika atuál.

Sekretáriu Jerál Partidu Demokrátiku (PD), António “Kalohan” da Conçeição hateten, PD halo hela aprosimasaun no sei hasoru malu ho FRERILIN hodi aprezenta sira-nia hanoin no atu rona perspetiva saida mak Comite Central Fretilin (CCF) sira hanoin.

“Aprosimasaun ne’ebé PD halo hela, ami sei hasoru-malu ho partidu FRETILIN, atu aprezenta ami-nia hanoin no ko’alia to’ok ami-nia hanoin ba sira. Dalaruma ita iha ita-nia fatin laiha komunikasaun ba malu entaun ita la komprende saida mak entendimentu. Posivelmente, aban ami bele hasoru ona ho Comite Central FRETILIN (CCF), tenta to’ok perspetiva saida mak CCF hanoin,” dehan Sekretáriu Jerál Partidu Demokrátiku (PD), António “Kalohan” da Conçeição ba jornalista sira iha resintu Parlamentu Nasionál, ohin.

Nia hatutan, PD tenta ba ko’alia nafatin ho partidu boot Fretilin no CNRT kona-ba entendimentu ba saida mak dezenvolvimentu nasionál no ba objetvu estratéjiku país ne’e mós hanesan entendimentu ida.

“Agora ho CNRT mós tenta atu halo iha tempu badak. Tanba, karta ami dirije ona ba partidu boot CNRT. Primeiru, ami buka atu hatuur lai partidu boot rua nian depois ami iha intensaun atu ko’alia ho Primeiru-Ministru no Partidu Libertasaun Populár (PLP), atu haree to’ok relasaun atu hakat liu impase polítika ne’e, hotu-hotu hanesan partidu, saida mak bele halo. Ida-ne’e mak agora daudaun pontu situasaun ne’ebé PD iha,” nia haktuir.

Nia espera, partidu polítiku sira iha Timor-Leste bele iha vontade di’ak hodi buka solusaun ba impase polítika ne’ebé la’o ona iha tempu naruk nia laran.

Tanba ne’e, nia hateten, presiza buka forma ida kona-ba entendimentu tanba entendimentu ne’e dalaruma interpretasaun iha ukun ninian ne’e hanoin dehan buka fahe-malu kadeira de’it. Maibé, ba PD, ida-ne’e hanesan núkleu ba saida mak interese nasionál no timoroan tomak tuur hamutuk atu defende objetivu Estadu nian.

“La’ós nesesariamente tenkeser ba kaer hotu pasta iha Governu, bele halo pozisaun liuhosi aktu polítiku sira-ne’ebé halo iha Parlamentu Nasionál. Tanba ne’e mak PD sei nafatin iha konviksaun ida-ne’e no fiar promove nafatin entendimentu entre partidu hotu-hotu maibé iha ne’e determinante loos mak líder istóriku sira hotu nia papél,” nia dehan.

Notísia Relevante: PD Hein Movimentu Polítiku Hosi FRETILIN no CNRT

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here